തിരുവനന്തപുരം: മലങ്കര സഭാ തര്‍ക്കത്തില്‍ സുപ്രിംകോടതി വിധി നടപ്പാക്കാത്ത സംസ്ഥാന സര്‍ക്കാര്‍ നടപടിക്കെതിരെ അന്ത്യശാസനയുമായി ഓര്‍ത്തഡോക്‌സ് സഭ. ഒരാഴ്ചയ്ക്കുള്ളില്‍ നടപടിയുണ്ടായില്ലെങ്കില്‍ സര്‍ക്കാരിനെതിരെ കോടതി അലക്ഷ്യത്തിന് ഹരജി നല്‍കുമെന്നും സഭ മുന്നറിയിപ്പു നല്‍കി.

മലങ്കരയുടെ അവകാശം സംബന്ധിച്ച് ഓര്‍ത്തഡോക്‌സ് സഭയ്ക്ക് അനുകൂലമായ വിധിയാണ് സുപ്രിംകോടതിയില്‍ നിന്നുണ്ടായത്. 2017 ജൂലൈയില്‍ ഇതു സംബന്ധിച്ച വിധി വന്നിട്ടും ഇതുവരെ നടപ്പാക്കിയിട്ടില്ല.

കോലഞ്ചേരി സെന്റ് പീറ്റേഴ്‌സ് ആന്‍ഡ് സെന്റ് പോള്‍സ് പള്ളിയുടെ ഭരണവും ഉടമസ്ഥാവകാശവും സംബന്ധിച്ച തര്‍ക്കത്തില്‍ യാക്കോബായ സഭ നല്‍കിയ ഹരജി തള്ളിക്കൊണ്ടായിരുന്നു സുപ്രിംകോടതി വിധി. 1934ലെ മലങ്കര സഭാ ഭരണഘടനപ്രകാരം ഭരണം നടത്തണമെന്ന് ഉത്തരവിട്ട രണ്ടംഗബെഞ്ച്, ഇതു സംബന്ധിച്ച് 1995ല്‍ സുപ്രിംകോടതി പുറപ്പെടുവിച്ച ഉത്തരവില്‍ മാറ്റം വരുത്തേണ്ടതില്ലെന്നും വ്യക്തമാക്കിയിരുന്നു.

2002ല്‍ യാക്കോബായ സഭ കൊണ്ടുവന്ന ഭരണഘടന നിലനില്‍ക്കില്ലെന്നും ജസ്റ്റിസുമാരായ അരുണ്‍മിശ്ര, അമിതവ റോയി എന്നിവരടങ്ങിയ രണ്ടംഗബെഞ്ച് ഉത്തരവിട്ടു. 1934ലെ മലങ്കരസഭയുടെ ഭരണഘടന ശരിവച്ചാണ് കോടതിയുടെ നിര്‍ണായക വിധി. 1913ലെ ഉടമ്പടി പ്രകാരം പള്ളികള്‍ ഭരിക്കപ്പെടാന്‍ അനുവദിക്കണം എന്നാവശ്യപ്പെട്ട് കോലഞ്ചേരി, വരിക്കോലി, മണ്ണത്തൂര്‍ പള്ളികളിലെ യാക്കോബായ വിശ്വാസികള്‍ സമര്‍പ്പിച്ച ഹരജിയിലാണ് കോടതി ഉത്തരവ്.

പള്ളിയുടെ ഭരണകാര്യത്തില്‍ 1913ല്‍ ഉണ്ടാക്കിയ ഉടമ്പടി പാലിക്കണമെന്നും 2002ല്‍ രൂപീകരിച്ച ഭരണഘടന അംഗീകരിക്കണമെന്നും ആവശ്യപ്പെട്ട് യാക്കോബായ സഭയ്ക്കു വേണ്ടി വര്‍ഗീസ് എന്ന വിശ്വാസിയാണ് സുപ്രിം കോടതിയെ സമീപിച്ചത്. 1995ലെ സുപ്രിം കോടതിയുടെ ഉത്തരവ് പ്രകാരം പള്ളികളുടെ ഭരണവും ഉടമസ്ഥാവകാശവും മലങ്കര സഭയ്ക്കായിരുന്നു. ഇടവക അംഗങ്ങളുടെ ഭൂരിപക്ഷം നിര്‍ണയിച്ചു ഭരണം നല്‍കണമെന്ന 1913ലെ ഉടമ്പടി ഈ ഉത്തരവില്‍ കണക്കിലെടുത്തിട്ടില്ലെന്നും അതിനാല്‍ അവ്യക്തത നീക്കണമെന്നും ഹരജിക്കാര്‍ വാദിച്ചു. എന്നാല്‍, 1995ലെ ഉത്തരവില്‍ വ്യക്തത വരുത്തിയതായി നിരീക്ഷിച്ച കോടതി, യാക്കോബായ വിഭാഗത്തിന്റെ ആവശ്യം തള്ളിക്കളയുകയായിരുന്നു.

മലങ്കര സഭയുടെ ഭരണവും പള്ളികളുടെ ഉടമസ്ഥാവകാശവും 1934ലെ ഭരണഘടനാപ്രകാരമായിരിക്കണമെന്നാണ് 1995ല്‍ സുപ്രിംകോടതിയുടെ മൂന്നംഗബെഞ്ച് ഉത്തരവിട്ടത്. മൂന്നംഗ ബെഞ്ചിലെ ജസ്റ്റിസ് ആര്‍.എം.സഹായി ഭൂരിപക്ഷ വിധിയോടു വിയോജിപ്പ് വ്യക്തമാക്കി പ്രത്യേക വിധി എഴുതിയിരുന്നെങ്കിലും ഇക്കാര്യം പരിശോധിച്ച രണ്ടംഗ ബെഞ്ച് പ്രത്യേക പരാമാര്‍ശം ഒന്നും ഇന്നലെ നടത്തിയില്ല. അതേസമയം, ഉത്തരവിന്റെ പൂര്‍ണരൂപം പുറത്തിറങ്ങാത്തതിനാല്‍ ഇക്കാര്യത്തില്‍ മാത്രമല്ല, ആരാധന സംബന്ധിച്ച കാര്യത്തിലും അവ്യക്തത തുടരുകയാണ്. നേരത്തെ, ആരാധന നടത്താന്‍ അനുവദിക്കണമെന്ന ആവശ്യത്തില്‍ ഇരുവിഭാഗത്തിനും ആരാധന നടത്താന്‍ ഒരുപോലെ സൗകര്യം ലഭിക്കുന്ന വിധത്തില്‍ സമയം ക്രമീകരിക്കാന്‍ ഉത്തരവിട്ടിരുന്നു. അന്തിമ ഉത്തരവ് പുറത്തുവരുന്നതു വരെ ഈ ക്രമീകരണം തുടരണമെന്നും കോടതി നിര്‍ദേശിച്ചിരുന്നു.