തൃശൂര്‍: യുവസംവിധായകനെ മര്‍ദിച്ച് കാറില്‍ കടത്തിക്കൊണ്ടു പോയി. സംവിധായകനും നടനുമായ നിഷാദ് ഹസനെ(36)യാണ് കാറിലെത്തിയ സംഘം തട്ടിക്കൊണ്ടു പോയത്. ചിറ്റിലപ്പിള്ളി മുള്ളൂര്‍ക്കായലിനു സമീപം ബുധനാഴ്ച പുലര്‍ച്ചെയാണ് സംഭവം. നിഷാദിനൊപ്പം ഉണ്ടായിരുന്ന ഭാര്യക്കും മര്‍ദനത്തില്‍ പരുക്കേറ്റു.

നിഷാദ് സംവിധാനം ചെയ്ത പുതിയ സിനിമ 'വിപ്ലവം ജയിക്കാനുള്ളതാണ് ' കഴിഞ്ഞ വെള്ളിയാഴ്ചയാണ് റിലീസ് ചെയ്തത്. ഇതുമായി ബന്ധപ്പെട്ട് ഗുരുവായൂരിലേക്ക് പോകുമ്പോഴായിരുന്നു ആക്രമണം. കാറിലായിരുന്നു നിഷാദും ഭാര്യയും. പാവറട്ടി എത്തുന്നതിനിടയില്‍ മറ്റൊരു കാറിലെത്തിയ സംഘം ഇവരെ തടഞ്ഞുനിര്‍ത്തി പുറത്തിറക്കി ആക്രമിക്കുകയായിരുന്നു. മര്‍ദിച്ചവശനാക്കിയ ശേഷമാണ് നിഷാദിനെ കടത്തിക്കൊണ്ടു പോയത്.നേരത്തെ സിനിമയുമായി ബന്ധപ്പെട്ട് നിര്‍മാതാവ് രണദേവുമായി തര്‍ക്കം ഉണ്ടായിരുന്നുവെന്നും ഭീഷണിപ്പെടുത്തിയിരുന്നുവെന്നും ഭാര്യ നല്‍കിയ പരാതിയില്‍ പറയുന്നു.