ചെര്‍പ്പുളശ്ശേരി: രണ്ടു ദിവസങ്ങളിലായി സംഘടിപ്പിച്ച 14ാമത് ജില്ലാ ബധിര കായിക മേള ട്രോഫിയെ ചൊല്ലിയുള്ള തര്‍ക്കത്തെ തുടര്‍ന്ന് തടസപ്പെട്ടു. ആദ്യ ദിവസം അത് ലറ്റിക് മത്സരങ്ങള്‍ സുഗമമായി പൂര്‍ത്തിയായിരുന്നു. എന്നാല്‍ രണ്ടാം ദിവസമായ ശനിയാഴ്ച വോളിബോള്‍, ഫുട്ബാള്‍ മത്സരങ്ങള്‍ നടക്കുമ്പോഴാണ് തര്‍ക്കങ്ങള്‍ ആരംഭിച്ചത്. മൂന്നു തവണ വോളിബോളില്‍ ചാംപ്യന്‍മാരായ ഷൊര്‍ണൂര്‍ ഡി ആര്‍ ഡി എസ് കോളേജ് ട്രോഫി തിരിച്ചു നല്‍കാന്‍ തയ്യാറാവാത്തതാണ് പ്രശ്‌നത്തിന് ഇടയാക്കിയത്. എന്നാല്‍ ട്രോഫി തിരിച്ചേല്‍പ്പിക്കാതെ മത്സരത്തില്‍ പങ്കെടുക്കേണ്ട എന്ന തീരുമാനം ജില്ലാ ബധിര സ്‌പോര്‍ട്‌സ് കൗണ്‍സില്‍ ഉന്നയിച്ചതോടെ തര്‍ക്കമുണ്ടാവുകയായിരുന്നു. മൂന്നു വര്‍ഷം തുടര്‍ച്ചയായി ട്രോഫി ലഭിക്കുകയാണെങ്കില്‍ ട്രോഫി സ്വന്തമായി എടുക്കാം എന്നതുകൊണ്ടാണ് തിരിച്ചേല്‍പ്പിക്കാത്തതെന്നാണ് ഷൊര്‍ണ്ണൂര്‍ ഡി ആര്‍ ഡി എസ് .കോളേജധികൃതര്‍ പറയുന്നത്. തര്‍ക്കം കയ്യാങ്കളിയിലേക്ക് നീങ്ങുമെന്നായതോടെ ചെര്‍പ്പുളശ്ശേരി പൊലീസും സ്ഥലത്തെത്തി ചര്‍ച്ച നടത്തിയെങ്കിലും പ്രശ്‌നം പരിഹരിക്കാനായില്ല . തുടര്‍ന്ന് സ്‌പോര്‍ട്‌സ് കൗണ്‍സിലിന്റെ തീരുമാന പ്രകാരം മത്സരം നിര്‍ത്തിവക്കുകയായിരുന്നു.