തളിപ്പറമ്പ്: മഴക്കാലത്ത് ശക്തമായ നീരൊഴുക്കുള്ള തോട് സ്വകാര്യ വ്യക്തി മണ്ണിട്ട് നികത്തിയതായി പരാതി. തളിപ്പറമ്പ് മുയ്യം ബാവുപ്പറമ്പ് റോഡില്‍ ഭ്രാന്തന്‍കുന്ന് ഇറക്കത്തില്‍ റോഡിന് കുറുകെയുള്ള തോടാണ് മണ്ണിട്ട് നികത്തിയത്. അതേസമയം കുറുമാത്തൂര്‍ പഞ്ചായത്ത് സെക്രട്ടറിക്ക് പരാതി നല്‍കിയിട്ടും നടപടി സ്വീകരിക്കാത്തതിനെ തുടര്‍ന്ന് നാട്ടുകാര്‍ പ്രതിഷേധവുമായി രംഗത്തെത്തി.
ചെറിയ തോടിന്റെ 60 മീറ്ററോളം ഭാഗം രണ്ടു സ്ഥലത്തായി മണ്ണിട്ട് മൂടിയതായാണ് പരാതി. മൂന്ന് മീറ്റര്‍ വീതിയിലുള്ള തോട് മണ്ണിട്ട് മൂടി 15 സെന്റിമീറ്റര്‍ വീതിയിലുള്ള പൈപ്പ് ഇട്ടിരിക്കുകയാണ്.
സംഭവത്തെ കുറിച്ച് പ്രദേശവാസി പഞ്ചായത്ത് അധികൃതരോട് അന്വേഷിച്ചപ്പോള്‍ പരാതി ലഭിച്ചാല്‍ നടപടിയെടുക്കുമെന്ന് അറിയിച്ചിരുന്നു. തുടര്‍ന്ന് പരാതി നല്‍കുകയും ഇതിന്റെ അടിസ്ഥാനത്തില്‍ സ്ഥലം പരിശോധിച്ച അധികൃതര്‍ മുഴുവനായും മണ്ണിട്ട് മൂടിയതിനാല്‍ ഇനിയൊന്നും ചെയ്യാനാകില്ലെന്ന് പരാതിക്കാരനെ അറിയിക്കുകയായിരുന്നു.
കൂടാതെ കുറുമാത്തൂര്‍ പഞ്ചായത്ത് സെക്രട്ടറി തോട് മണ്ണിട്ടു മൂടിയതില്‍ തങ്ങള്‍ക്ക് ഒരു പ്രശ്‌നവും ഇല്ലെന്നും പരാതിക്കാരെ കണ്ട് ഒത്തു തീര്‍പ്പിന് ശ്രമിക്കാനും സ്വകാര്യ വ്യക്തിക്ക് നിര്‍ദ്ദേശം നല്‍കിയെന്നും നാട്ടുകാര്‍ ആരോപിക്കുന്നു. തോട് പൂര്‍വസ്ഥിതിയിലാക്കുന്നതിന് തളിപ്പറമ്പ് തഹസില്‍ദാര്‍ക്ക് പരാതി നല്‍കാനൊരുങ്ങുകയാണ് നാട്ടുകാര്‍.