ഉബൈദുല്ല റഹ്മാനി

മനാമ: ബഹ്‌റൈനില്‍ മാര്‍ബിള്‍ ഇറക്കുന്നതിനിടെ മാര്‍ബിള്‍ പാളി അടര്‍ന്നു വീണതിനെ തുടര്‍ന്നുണ്ടായ അപകടത്തില്‍ ഒരു മലയാളി മരിക്കുകയും നാലു മലയാളികള്‍ക്ക് പരുക്കേല്‍ക്കുകയും ചെയ്തു.
തിരുവനന്തപുരം നെയ്യാറ്റിന്‍കര മാരായമുട്ടം കല്ലിടാന്തി സി.എസ് ഭവനില്‍ നിഷാന്ത് ദാസ് (27)ആണ് മരിച്ചത്.

ബഹ്‌റൈനിലെ ആലിബൂരിയില്‍ ഞായറാഴ്ച കാലത്താണ് സംഭവം. ഒമാനില്‍ നിന്നുംക്കൊണ്ടുവന്ന മാര്‍ബിള്‍ സ്വകാര്യകമ്പനിയില്‍ ഇറക്കുന്നതിനിടെ മാര്‍ബിള്‍പാളി പൊട്ടിവീണാണ് അപകടമുണ്ടായതെന്നാണ് റിപ്പോര്‍ട്ട്.

നിഷാന്ത് ദാസ് സംഭവസ്ഥലത്തു തന്നെ മരണപ്പെട്ടു. പരുക്കേറ്റ നാലു പേരെയും ബി.ഡി.എഫ് ആശുപത്രിയില്‍ പ്രവേശിപ്പിച്ചിരിക്കുകയാണ്. ഇവരില്‍ രണ്ടുപേരുടെ പരുക്ക് ഗുരുതരമല്ല. ഇവരെ പ്രാഥമിക ശുശ്രൂഷ നല്‍കി ഉടന്‍ ഡിസ്ചാര്‍ജ്ജ് ചെയ്യുമെന്ന് ബന്ധപ്പെട്ടവര്‍ അറിയിച്ചു.

മരണമടഞ്ഞ നിഷാന്ത് ദാസ് 2013 ലാണ് ബഹ്‌റൈനില്‍ എത്തിയത്. കുടുംബം നാട്ടിലാണ്. മൃതദേഹം സല്‍മാനിയ ആശുപത്രി മോര്‍ച്ചറിയിലേക്ക് മാറ്റി. മൃതദേഹം നാട്ടിലെത്തിക്കാനുള്ള നടപടികള്‍ ആരംഭിച്ചിട്ടുണ്ട്.