തുറവൂര്‍: ദേശീയപാതയോരത്ത് നിന്നും പൊളിച്ചു നീക്കിയ പെട്ടിക്കടകള്‍ ഉയരുന്നു. തുറവൂര്‍ തെക്ക് വില്ലേജിന് മുന്‍ഭാഗത്ത് കച്ചവടക്കാരുടെ നാലു വീലുള്ള മൊബൈല്‍ വണ്ടികളുടെ നിര തന്നെ കാണാം.
ദേശിയ പാത അധികൃതര്‍ രണ്ട് ഘട്ടമായി ഒഴിപ്പിച്ച കടകള്‍ ദിനംപ്രതി വര്‍ധിക്കുകയാണ്. തുറവുര്‍ ബസ് സ്റ്റോപ്പിന് തെക്ക് ഭാഗത്ത് വൈകിട്ട് 5 മുതല്‍ രാത്രി വരെ ഷീറ്റ് കൊണ്ടുള്ള ഷെഡ് കെട്ടി ഹോട്ടല്‍ കച്ചവടം തകൃതിയായി നടന്നു വരുകയാണ്. തുറവൂറിന്റെ വിവിധ ഭാഗങ്ങളിലായി ധാരാളം വഴിയോര കച്ചവടങ്ങള്‍ നടക്കുന്നു.
നാട്ടുകാര്‍ വിവരം ദേശീയ പാത അധികൃതരെ പലതവണ രേഖാമൂലം അറിയിച്ചിട്ടും നടപടികളൊന്നും സ്വീകരിക്കാത്തതില്‍ ജനങ്ങള്‍ക്ക് ശക്തമായ പ്രതിഷേധമുണ്ട്. വഴിയോര കച്ചവടക്കാരില്‍ നിന്നും കോഴ വാങ്ങി സംരക്ഷിക്കുന്ന ദേശീയ പാത ചേര്‍ത്തല ഡിവിഷന്‍ അധികൃതര്‍ക്ക് എതിരെ പൊതുമരാമത്ത് വകുപ്പ് മന്ത്രിക്ക് പരാതി നല്‍കാനൊരുങ്ങുകയാണ് തുറവൂര്‍ നിവാസികള്‍.
കാല്‍നടയാത്രക്കാര്‍ക്ക് ബുദ്ധിമുട്ടുകള്‍ സൃഷ്ടിക്കുന്ന അനധികൃത കച്ചവടക്കാരെ ഒഴിപ്പിക്കുക തന്നെ വേണമെന്നാവശ്യം ശക്തമാണ്.