ജമ്മു: വെടിനിര്‍ത്തല്‍ കരാര്‍ ലംഘിച്ച് ജമ്മുകശ്മീരില്‍ പാകിസ്താന്റെ വെടിവയ്പ്. ബീഹാര്‍ സ്വദേശിയായ ഒരു ഇന്ത്യന്‍ സൈനികന്‍ വെടിവയ്പ്പില്‍ കൊല്ലപ്പെട്ടു. നാല് ഇന്ത്യന്‍ സൈനികര്‍ക്ക് പരുക്കേറ്റു. രവി രഞ്ജന്‍ കുമാര്‍(36) എന്ന സൈനികനാണ് കൊല്ലപ്പെട്ടത്. രാവിലെ 11 മണിയോടെയാണ് കൃഷ്ണ ഘാട്ടി സെക്ടറില്‍ വെടിവെപ്പ് ആരംഭിച്ചത്. അതേസമയം ഇന്ത്യന്‍ സേന പാകിസ്താന്‍ സേനയ്ക്ക് കനത്ത തിരിച്ചടി നല്‍കിയതായും പ്രതിരോധ വക്താവ് അറിയിച്ചു.
അതിര്‍ത്തിയില്‍ വെടിവെപ്പ് തുടരുകയാണെന്നും ഔദ്യോഗിക വൃത്തങ്ങള്‍ വ്യക്തമാക്കിയിരുന്നു.

അതിനിടെ കശ്മീര്‍ പ്രശ്‌നത്തിന്റെ പേരില്‍ ഇന്ത്യയുമായി സംഘര്‍ഷമുണ്ടാവരുതെന്നും പ്രകോപനപരമായ പ്രസ്താവനകള്‍ ഒഴിവാക്കണമെന്നും യു.എസ് പ്രസിഡന്റ് ഡൊണാള്‍ഡ് ട്രംപ് പാക് പ്രധാനമന്ത്രി ഇമ്രാന്‍ഖാനോട് ആവശ്യപ്പെട്ടു. കശ്മീരിന്റെ പ്രത്യേക അധികാരം ഇന്ത്യ എടുത്തു കളഞ്ഞതിനെ തുടര്‍ന്ന് ഇരു രാജ്യങ്ങളും തമ്മിലെ നയതന്ത്രബന്ധം വഷളായ സാഹചര്യത്തിലാണ് ട്രംപിന്റെ നിര്‍ദേശം. കഴിഞ്ഞ ദിവസം ഇന്ത്യന്‍ പ്രധാനമന്ത്രി നരേന്ദ്രമോദി ട്രംപുമായി 30 മിനുട്ട് കശ്മീര്‍ വിഷയത്തെ കുറിച്ച് ഫോണില്‍ സംസാരിച്ചിരുന്നു. തുടര്‍ന്നാണ് ട്രംപ് ഇമ്രാന്‍ഖാനെ വിളിച്ചത്. കശ്മീരിലെ സ്ഥിതിഗതികള്‍ അങ്ങേയറ്റം സങ്കീര്‍ണമാണെന്നും ട്രംപ് അഭിപ്രായപ്പെട്ടു.