ന്യൂഡല്‍ഹി: ഐ.എന്‍.എക്‌സ് മീഡിയ കേസില്‍ മുന്‍ ധനമന്ത്രി പി.ചിദംബരം സമര്‍പ്പിച്ച മുന്‍കൂര്‍ ജാമ്യാപേക്ഷ ഡല്‍ഹി ഹൈക്കോടതി തള്ളി. ജസ്റ്റിസ് ഗൗര്‍ ആണ് ജാമ്യാപേക്ഷ തള്ളിയത്. ഉത്തരവ് നടപ്പാക്കുന്നത് മൂന്ന് ദിവസത്തേക്ക് തടഞ്ഞുവെക്കണമെന്ന അഭിഭാഷകന്റെ ആവശ്യവും കോടതി തള്ളി.
തുടര്‍ന്ന് ചിദംബരം സുപ്രിംകോടതിയെ സമീപിച്ചു. മുന്‍കൂര്‍ ജാമ്യാപേക്ഷയില്‍ അടിയന്തരമായി വാദം കേള്‍ക്കണമെന്ന് ആവശ്യപ്പെട്ടാണ് ചിദംബരം സുപ്രിംകോടതിയെ സമീപിച്ചത്.
യു.പി.എ സര്‍ക്കാരില്‍ ധനമന്ത്രിയായിരിക്കെ ചട്ടം ലംഘിച്ച് ഐ.എന്‍.എസ് മീഡിയാ കമ്പനിക്ക് പി.ചിദംബരം വിദേശനിക്ഷേപം സ്വീകരിക്കാന്‍ ഇന്ദ്രാണി മുഖര്‍ജി, പീറ്റര്‍ മുഖര്‍ജി എന്നിവരുടെ ഉടമസ്ഥതയിലുള്ള കമ്പനിക്ക്
അനുമതി നേടിക്കൊടുത്തുവെന്നാണ് കേസ്.
വിദേശ നിക്ഷേപ പ്രോത്സാഹന ബോര്‍ഡിന്റെ ചട്ടപ്രകാരം 4.62 കോടി രൂപ വിദേശനിക്ഷേപം സ്വീകരിക്കാനേ ഈ കമ്പനിക്ക് അര്‍ഹതയുള്ളൂ. ഇത് ലംഘിച്ച് 305 കോടി രൂപ കമ്പനി വാങ്ങിയെന്നായിരുന്നു ആരോപണം. അതേ സമയം മോദി സര്‍ക്കാരിന്റെ പ്രതികാര നടപടിയാണ് കേസെന്നാണ് കോണ്‍ഗ്രസ് പ്രതികരിച്ചത്. ഇന്ന് ചിദംബരത്തിന്‍െ വീട്ടില്‍ സി.ബി.ഐ റെയ്ഡ് നടത്തിയിരുന്നു. എന്നാല്‍ ഒന്നും ലഭിക്കാതെ സംഘം മടങ്ങുകയായിരുന്നു.