മെല്‍ബണ്‍: ലൈംഗിക പീഡനത്തിന് ശിക്ഷിക്കപ്പെട്ട ഏറ്റവും മുതിര്‍ന്ന കത്തോലിക്കാ പുരോഹിതനായ കര്‍ദിനാള്‍ ജോര്‍ജ് പെല്ലിന്റെ അപ്പീല്‍ ഓസ്‌ത്രേലിയന്‍ കോടതി തള്ളി. 1990കളില്‍ മെല്‍ബണിലെ സെന്റ് പാട്രിക്‌സ് കത്തീഡ്രലില്‍ 16 വയസ്സില്‍ താഴെയുള്ള ആണ്‍കുട്ടികളെ പീഡിപ്പിച്ച കേസില്‍ കര്‍ദി നാള്‍ കുറ്റക്കാരനാണെന്ന് കണ്ടെത്തിയ മെല്‍ബണ്‍ കൗണ്ടി കോടതി അദ്ദേഹത്തിന് ആറ് വര്‍ഷത്തെ തടവുശിക്ഷ വിധിച്ചിരുന്നു. താന്‍ നിരപരാധിയാണെന്ന് ചൂണ്ടിക്കാട്ടിയാണ് അദ്ദേഹം അപ്പീല്‍ സമര്‍പ്പിച്ചിരുന്നത്. 2022 ഒക്ടോബറിലാണ് ഇനി പരോള്‍ ലഭിക്കുക.
സെന്റ് പാട്രിക്‌സ് കത്തീഡ്രലിലെ ഗായകസംഘത്തിലെ രണ്ട് ആണ്‍കുട്ടികളെയാണ് 22 വര്‍ഷം മുമ്പ് കര്‍ദിനാള്‍ ജോര്‍ജ് പെല്‍ ലൈംഗികമായി പീഡിപ്പിച്ചത്. സംഭവത്തില്‍ ഏതാനും വര്‍ഷങ്ങള്‍ക്ക് മുന്‍പ് പരാതി പുറത്തുവന്നു. കോടതിയുടെ വിലക്കിനെ തുടര്‍ന്ന് ഓസ്‌ത്രേലിയന്‍ മാധ്യമങ്ങള്‍ ഇത് സംബന്ധിച്ച് വാര്‍ത്തകള്‍ നല്‍കിയിരുന്നില്ല.