കരുവാരകുണ്ട്: ലക്ഷങ്ങള്‍ വിലവരുന്ന നിരോധിത മയക്കുമരുന്നുമായി കരിങ്കന്തോണിയില്‍ പൊന്മള കോഡൂര്‍ സ്വദേശി പട്ടര്‍കടവ് ജലീലി (44) നെ കരുവാരകുണ്ട് എസ്.ഐ പി ജ്യോതീന്ദ്രകുമാറിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തു.
പുല്‍വെട്ട കരിങ്കന്തോണിയിലെ വട്ടമലയില്‍ നിന്നാണ് അറസ്റ്റ് ചെയ്തത്. രഹസ്യ വിവരത്തെ തുടര്‍ന്ന് കരുവാരകുണ്ട് എസ്.ഐയും സംഘവും വട്ടമലയിലെത്തിയപ്പോള്‍ ഇയാള്‍ ബ്രൗണ്‍ ഷുഗര്‍ സിറിഞ്ചുവഴി ഉപയോഗിക്കുകയായിരുന്നു. പ്രതിയിരുന്ന സ്ഥലത്തു നിന്ന് സിറിഞ്ചുകളും മറ്റു ഉകരണങ്ങളും ലഭിച്ചിട്ടുണ്ട്.
തുടര്‍ന്ന് നടത്തിയ പരിശോധനയില്‍ ഇയാളില്‍ നിന്ന് ആറര ഗ്രാം ബ്രൗണ്‍ഷുഗര്‍, നാലു ഗ്രാം കറുപ്പ്, ഒന്നരക്കിലോ കഞ്ചാവ്, ഉപയോഗിക്കാനുള്ള സിറിഞ്ച്, മെഷര്‍മെന്റ് ഉപകരണം എന്നിവ പിടികൂടിട്ടുണ്ട്. വിദ്യാര്‍ഥികളെ കേന്ദ്രീകരിച്ചും ഇയാള്‍ വില്‍പന നടത്താറുണ്ട്. ഒരു പൊതിക്ക് പതിനായിരം രൂപയാണ് വാങ്ങുന്നത്. പ്രതിയുടെ കൈയില്‍ കൂടുതല്‍ ഉണ്ടാകാമെന്നും ഇതിന്റെ ഉവിടം കണ്ടെത്താനായി അന്വേഷണം ആരംഭിച്ചതായും പൊലിസ് പറഞ്ഞു. തല്ലു കേസിലും മയക്കുമരുന്ന് കേസിലും മുന്‍പ് ശിക്ഷ അനുഭവിച്ചിട്ടുണ്ട്. ഇന്ന് വടകര കോടതിയില്‍ ഹാജരാക്കും.