കൊല്ലം: സാഹിത്യത്തില്‍ നിലവിലുള്ള വ്യവസ്ഥയ്‌ക്കെതിരേ കലാപമായി മാറിയ മുന്നേറ്റത്തിന് നേതൃത്വം നല്‍കിയ എഴുത്തുകാരില്‍ പ്രധാനിയായിരുന്നു കാക്കനാടനെന്ന് കവി ബാലചന്ദ്രന്‍ ചുള്ളിക്കാട്.
കാക്കനാടന്റെ ഏഴാം ചരമവാര്‍ഷികദിനത്തില്‍ കാക്കനാടന്‍ ഫൗണ്ടേഷന്‍ കൊല്ലത്ത് സംഘടിപ്പിച്ച സ്മൃതിസംഗമം ഉദ്ഘാടനം ചെയ്യുകയായിരുന്നു അദ്ദേഹം. നിലവിലുള്ള ഭാഷാ വ്യവസ്ഥയെയും സദാചാര വ്യവസ്ഥയെയും സാമൂഹ്യവ്യവസ്ഥയെയും ചോദ്യം ചെയ്യുകയും ധ്വംസിക്കുകയും ചെയ്ത എഴുത്തുകാരനാണ് കാക്കനാടന്‍. എഴുത്തില്‍ മാത്രമല്ല ജീവിതത്തിലും ആ രീതി അദ്ദേഹം നിലനിര്‍ത്തിയെന്നും ചുള്ളിക്കാട് കൂട്ടിച്ചേര്‍ത്തു. കാക്കനാടന്‍ ഫൗണ്ടേഷന്‍ ചെയര്‍മാനും മുന്‍മന്ത്രിയുമായ എം.എ ബേബി ചടങ്ങില്‍ അധ്യക്ഷനായി. ഡോ.പി.കെ രാജശേഖരന്‍ മുഖ്യപ്രഭാഷണം നടത്തി. ബാബു കുഴിമറ്റം, ബി. മുരളി, കെ. ഭാസ്‌കരന്‍, ഡി. സുരേഷ്‌കുമാര്‍, ടി.മോഹനന്‍, രാധാ കാക്കനാടന്‍ എന്നിവര്‍ സംസാരിച്ചു.