മലപ്പുറം: പുളിക്കല്‍ ആലുങ്ങലില്‍ പ്രവര്‍ത്തിക്കുന്ന കൊണ്ടോട്ടി വനിതാ സഹകരണ സംഘത്തിന്റെ നിക്ഷേപത്തട്ടിപ്പിന് ഇരയായവര്‍ പ്രക്ഷോഭ പരിപാടികള്‍ ശക്തമാക്കുന്നു. നിക്ഷേപകരുടെ പണം തിരികെ കിട്ടണമെന്നും വയ്പാ തട്ടിപ്പിന് കാരണക്കാരായവര്‍ക്കെതിരെ നടപടിയെടുക്കണമെന്നും ആവശ്യപ്പെട്ട് 26ന് മാര്‍ച്ചും ധര്‍ണയും സംഘടിപ്പിക്കും. നിലവില്‍ സഹകരണ സംഘം പ്രവര്‍ത്തിക്കുന്ന ഓഫിസിലേക്ക് നടക്കുന്ന മാര്‍ച്ചില്‍ തട്ടിപ്പിനിരയായ മുഴുവന്‍ ഇരകളും ബന്ധുക്കളും പങ്കെടുക്കുമെന്ന് ഭാരവാഹികള്‍ മലപ്പുറത്ത് വാര്‍ത്താ സമ്മേളനത്തില്‍ അറിയിച്ചു.
വിവിധ ഭാഗങ്ങളിലെ ഇടപാടുകാരില്‍ നിന്നായി രണ്ടരക്കോടിയോളം രൂപയാണ് സംഘം തട്ടിയെടുത്തത്. ഉയര്‍ന്ന പലിശ വാഗ്ദാനം ചെയ്ത് നിക്ഷേപം സ്വീകരിച്ച് സഹകരണ സംഘം വ്യാജ രേഖകള്‍ ചമച്ച് വായ്പാ തട്ടിപ്പ് നടത്തുകയായിരുന്നു. സഹകരണ സംഘം ഭരണ സമിതിയും ജീവനക്കാരുമാണ് തട്ടിപ്പിനു പിന്നിലെന്ന് നിക്ഷേപകര്‍ ആരോപിച്ചു. പാവപ്പെട്ട കൂലിപ്പണിക്കാരില്‍ നിന്നും കച്ചവടക്കാരില്‍ നിന്നും നിത്യ പിരിവിലൂടെയും സ്ഥിര നിക്ഷേപത്തിലൂടെയും വാങ്ങിയ പണമാണ് തിരിച്ചു കൊടുക്കാതെ വെട്ടിച്ചത്.
പണം നഷ്ടപ്പെട്ട നിക്ഷേപകര്‍ പല തവണ കൂട്ടായി സംഘം അധികൃതരെ സമീപിച്ചെങ്കിലും ഫലമുണ്ടായിട്ടില്ല. തുടര്‍ന്ന് മുഖ്യമന്ത്രി, സഹകരണ മന്ത്രി, സഹകരണ സംഘം അസിസ്റ്റന്റ് രജിസ്ട്രാര്‍, കൊണ്ടോട്ടി പൊലിസ് എന്നിവര്‍ക്ക് പരാതി നല്‍കി. എന്നാല്‍ പണം തട്ടിയെടുത്തവര്‍ക്കെതിരേയോ പരാതിക്കാര്‍ക്കനുകൂലമായോ യാതൊരു വിധ നടപടിയുമുണ്ടായിട്ടില്ല. ഇതിനെ തുടര്‍ന്നാണ് ഇരകള്‍ തുറന്ന സമരത്തിനിറങ്ങുന്നത്. വാര്‍ത്താ സമ്മേളനത്തില്‍ അഡ്വ. സി. ബാബു, സി. ചന്ദ്രന്‍, എന്‍.വി ശഫീഖ്, കെ.പി സുരേഷ് കുമാര്‍, കെ.പി സതീഷ് പങ്കെടുത്തു.