വ്യവസായ വാണിജ്യ നയത്തിന്റെ കരട് രൂപം പ്രഖ്യാപിച്ചു

തിരുവനന്തപുരം: സര്‍ക്കാരിന്റെ വ്യവസായ വാണിജ്യ നയത്തിന്റെ കരടു രൂപം പ്രസിദ്ധീകരിച്ചു. വ്യവസായ സൗഹൃദ സംസ്ഥാനമാക്കി മാറ്റുകയെന്ന ലക്ഷ്യത്തോടെയാണ് പുതിയ നയപ്രഖ്യാപനമെന്ന് മന്ത്രി എ.സി. മൊയ്തീന്‍ പറഞ്ഞു.
സംരംഭകര്‍ അഭിമുഖീകരിച്ചിരുന്ന നിയമ പ്രശ്‌നങ്ങള്‍ക്ക് കാതലായ മാറ്റം വരുത്തിയാണ് നയം രൂപീകരിച്ചിരിക്കുന്നത്. യുവ സംരംഭകരെയും വ്യവസായികളെയും സ്ഥാപനം തുടങ്ങുന്നതില്‍ നിന്ന് പിന്തിരിപ്പിക്കുന്നതില്‍ പ്രധാന കാരണം സംരംഭാനുമതി ലഭിക്കുന്നതിലുള്ള കാലതാമസമായിരുന്നു. ഇതില്‍ കാതലായ മാറ്റം വരുത്താന്‍ സര്‍ക്കാര്‍ തീരുമാനിച്ചു.
വ്യവസായ സംരംഭം ആരംഭിക്കുന്നതിന് അപേക്ഷ നല്‍കിയാല്‍ ഒരു മാസത്തിനുള്ളില്‍ ക്ലിയറന്‍സ് നല്‍കാനാണ് തീരുമാനം. മറുപടി ലഭിച്ചില്ലെങ്കിലും അനുമതി ലഭിച്ചതായി കണക്കാക്കി വ്യവസായം ആരംഭിക്കാനാകും. ആരംഭത്തില്‍ അനുവദിക്കുന്ന ലൈസന്‍സ് കാലാവധി എല്ലാ വകുപ്പുകള്‍ക്കും അഞ്ച് വര്‍ഷമായി നിജപ്പെടുത്തുന്നതിനുള്ള നടപടി കൈക്കൊള്ളും.
ഏകജാലക ക്ലിയറന്‍സ് സംവിധാനത്തിന്റെ മികച്ച പ്രവര്‍ത്തനത്തിന് വിവിധ വകുപ്പ് പ്രതിനിധികളെ ഉള്‍പ്പെടുത്തി കെ.എസ്.ഐ.ഡി.സിയെ നോഡല്‍ ഏജന്‍സിയായി നിയോഗിക്കാനും പ്രാഥമിക തീരുമാനമായി. ഇത് യാഥാര്‍ഥ്യമാകുന്നതോടെ വിവിധ വകുപ്പുകള്‍ കയറിയിറങ്ങി നടക്കേണ്ട അവസ്ഥയില്‍ നിന്ന് സംരംഭകര്‍ക്ക് മോചനം ലഭിക്കും.
ഈ സംവിധാനം ജില്ലാ തലത്തിലും പ്രായോഗികമാക്കുവാന്‍ ജില്ലാ കലക്ടറെ മേധാവിയാക്കി ജില്ലാ സമിതി രൂപീകരിക്കും. ക്ലിയറന്‍സുമായി ബന്ധപ്പെട്ട് എല്ലാ പ്രവര്‍ത്തനങ്ങള്‍ക്കും പൊതു വെബ് പോര്‍ട്ടല്‍ തുടങ്ങി എല്ലാ വകുപ്പുകളെയും ബന്ധപ്പെടുത്തും. ഇതുവഴി എല്ലാ അപേക്ഷകളും ഒരു പോയിന്റിലൂടെ സ്വീകരിക്കാന്‍ കഴിയുമെന്ന് മന്ത്രി പറഞ്ഞു.
പൊതുമേഖലാ സ്ഥാപനത്തിന്റെ ലാഭം പരിഗണിച്ച് സ്ഥാപനത്തിലെ ജീവനക്കാര്‍ക്ക് പങ്കാളിത്ത പെന്‍ഷന്‍ നടപ്പാക്കും. മുഴുവന്‍ പൊതുമേഖലാ സ്ഥാപനങ്ങളും ലാഭത്തിലാക്കാനുള്ള നടപടികള്‍ ഉടന്‍ ആരംഭിക്കാനാണ് തീരുമാനം.
മലബാര്‍ സിമന്റ്‌സ് ഉല്‍പാദനം ഇരട്ടിയാക്കും. ട്രാവന്‍കൂര്‍ സിമന്റ്‌സില്‍ ഗ്രേസിമന്റ് ഉല്‍പാദനം തുടങ്ങാനും തീരുമാനമായി. അസംസ്‌കൃത വസ്തുക്കള്‍ വാങ്ങുന്നതിനും വില്‍ക്കുന്നതിനും പൊതുമാനദണ്ഡം കൊണ്ടുവരും. വിദേശത്തുനിന്ന് തിരിച്ചെത്തുന്ന പ്രവാസികളെ വ്യവസായ രംഗത്തേക്ക് ആകര്‍ഷിക്കാനും നടപടി കൈകൊണ്ടിട്ടുണ്ട്.
ഇന്‍ഡസ്ട്രിയല്‍ എസ്റ്റേറ്റില്‍ മലയാളി പ്രവാസികള്‍ക്ക് അഞ്ച് ശതമാനം സംവരണം ഏര്‍പ്പെടുത്താനും തീരുമാനമായി. കൂടാതെ, വ്യവസായ പാര്‍ക്കുകളില്‍ സ്ത്രീകള്‍ക്കും സംവരണം കൊണ്ടുവരും.
സര്‍ക്കാര്‍ അധീനതയില്‍ അന്തര്‍ദേശീയ ഫര്‍ണിച്ചര്‍ ഹബ് സ്ഥാപിക്കും. എറണാകുളത്ത് ആമ്പല്ലൂരില്‍ ഇലക്ട്രോണിക് ഹാര്‍ഡ് വെയര്‍ പാര്‍ക്ക്, കൊച്ചി ഇന്‍ഫോ പാര്‍ക്കില്‍ ഇലക്ട്രോണിക് ഇന്‍കുബേറ്റര്‍, പാലക്കാട് ഡിഫന്‍സ് പാര്‍ക്ക്, കാക്കനാട് ഇലക്ട്രോണിക് ഉല്‍പാദന ക്ലസ്റ്റര്‍ എന്നീ അടിസ്ഥാന സൗകര്യങ്ങള്‍ വികസിപ്പിക്കും.
പൊതുജനങ്ങള്‍ക്ക് സഹായ വിലയ്ക്കും വന്‍കിട നിര്‍മാണത്തിന് വിപണി വിലയ്ക്കും മണല്‍, കല്ല് എന്നിവ ലഭ്യമാക്കും. പെട്രോകെമിക്കല്‍ കോംപ്ലക്‌സ് കൊച്ചിയില്‍ സ്ഥാപിക്കും. ഇതിനായി ഫാക്ടറിയില്‍ നിന്ന് 600 ഏക്കര്‍ സ്ഥലം ഏറ്റെടുക്കാന്‍ തത്വത്തില്‍ ഉത്തരവ് നല്‍കി. ചകിരി ക്ഷാമം പരിഹരിക്കുന്നതിനായി 100 ചകിരി മില്ലുകള്‍ സ്ഥാപിക്കും. കയര്‍ മെത്തയുടെയും കയര്‍ കമ്പോസ്റ്റ് ബോര്‍ഡിന്റെയും പുതിയ ഫാക്ടറികളും ഉടന്‍ ആരംഭിക്കുമെന്നും മന്ത്രി വ്യക്തമാക്കി.