കറാച്ചി: മുന്‍ പാക്കിസ്ഥാന്‍ നായകന്‍ മിസ്ബാ ഉള്‍ഹഖ് പാക്കിസ്ഥാന്‍ ക്രിക്കറ്റ് ടീമിലേക്ക് തിരിച്ചെത്തി. ഇത്തവണ പരിശീലകനായി തിരിച്ചെത്തിയ മുന്‍ താരം ടീമില്‍ രണ്ട് ചുമതല വഹിക്കും. മുഖ്യ പരിശീലകന്റെ റോളിനൊപ്പം മുഖ്യ സെലക്ടറായും സേവനമനുഷ്ഠിക്കും.
കൂടാതെ മുന്‍ സൂപ്പര്‍ ബൗളര്‍ വഖാര്‍ യൂനുസിനെ ബൗളിങ് കോച്ചായും നിയമിച്ചു. മൂന്നുവര്‍ഷത്തെ കരാറാണ് ഇരുവര്‍ക്കും നല്‍കിയിരിക്കുന്നത്. പാക്കിസ്ഥാനിലെ ആറു പ്രവിശ്യാ ക്രിക്കറ്റ് അസോസിയേഷനുകളുടെ പരിശീലകരാണ് സഹ സെലക്ടര്‍മാര്‍. ക്രിക്കറ്റിലെ വിപ്ലവകരമായ നീക്കമെന്നാണ് വിദഗ്ധര്‍ ഇതിനെ വിശേഷിപ്പിക്കുന്നത്.
ഡീന്‍ ജോണ്‍സ്, മോഹ്‌സിന്‍ ഖാന്‍, കോട്‌നി വാല്‍ഷ് തുടങ്ങിയവരും കോച്ചാകാനുള്ള പട്ടികയില്‍ ഇടംപിടിച്ചിരുന്നു. എന്നാല്‍ മിസ്ബയ്ക്ക് നറുക്ക് വീഴുകയായിരുന്നു. പാക് ക്രിക്കറ്റിലെ എക്കാലത്തെയും മികച്ച നായകരിലൊരാളായ മിസ്ബാ ഈയിടെയാണ് ക്രിക്കറ്റില്‍ നിന്ന് വിരമിച്ചത്.
ശ്രീലങ്കയ്‌ക്കെതിരായ ഏകദിന പരമ്പരയാണ് ഇരുവരുടെയും ആദ്യ പരീക്ഷണം. സെപ്റ്റംബര്‍ 27 മുതല്‍ ഒക്ടോബര്‍ ഒന്‍പതു വരെയാണ് ലങ്കയുമായുള്ള പരമ്പര. 45 കാരനായ മിസ്ബ 2017 മേയിലാണ് വിരമിച്ചത്.