കരുനാഗപ്പള്ളി: പുതിയകാവ് ചിറ്റുമൂല റെയില്‍വേ മേല്‍പ്പാലമെന്ന നാടിന്റെ ദീര്‍ഘകാല സ്വപ്നം യാഥാര്‍ഥ്യമാകുന്നു. പദ്ധതിക്കായി 29.91കോടി രൂപ സര്‍ക്കാര്‍ കിഫ്ബി യില്‍ നിന്നും അനുവദിച്ചു. ഏറെ തിരക്കുള്ള പുതിയകാവ്-ചക്കുവള്ളി റൂട്ടിലെ ചിറ്റുമൂല ലെവല്‍ക്രോസ് അടച്ചിടുന്നതുമൂലം വലിയ യാത്രാദുരിതമാണ് വര്‍ഷങ്ങളായി ജനങ്ങള്‍ അനുഭവിച്ചിരുന്നത്.
ആര്‍ രാമചന്ദ്രന്‍ എം.എല്‍.എയുടെ നിര്‍ദേശപ്രകാരമാണ് കഴിഞ്ഞ ബജറ്റില്‍ മേല്‍പ്പാലം അനുവദിച്ചത്. തുടര്‍ന്ന് കേരളാ റോഡ്‌സ് ആന്റ് ബ്രിഡ്ജസ് കോര്‍പ്പറേഷന്റെ നേതൃത്വത്തില്‍ സാധ്യതാ പഠനവും റിപ്പോര്‍ട്ടും തയാറാക്കിയിരുന്നു. ഈ റിപ്പോര്‍ട്ടിനാണ് കഴിഞ്ഞ ദിവസം ചേര്‍ന്ന കിഫ്ബി യോഗം അംഗീകാരം നല്‍കിയത്. കാട്ടില്‍കടവ്-ചക്കുവള്ളി റോഡിന്റെ പുനര്‍നിര്‍മാണത്തിനായി കേന്ദ്ര റോഡ് ഫണ്ടില്‍ നിന്നും16.5 കോടി രൂപ നേരത്തെ അനുവദിച്ചിരുന്നു. ടി.എസ് കനാലിന് കുറുകെ നിര്‍മിക്കുന്ന കാട്ടില്‍കടവ് പാലത്തിന്റെ സ്ഥലം ഏറ്റെടുക്കല്‍ നടപടികളും തുടങ്ങിക്കഴിഞ്ഞു. ഈ റോഡും മേല്‍പ്പാലവും യാഥാര്‍ഥ്യമാകുന്നതോടെ അഴീക്കല്‍ ഹാര്‍ബര്‍, അഴീക്കല്‍ ബീച്ച് എന്നിവയെ മലയോര മേഖലയുമായി വേഗത്തില്‍ ബന്ധിപ്പിക്കാന്‍ കഴിയും. ആധുനിക രീതിയില്‍ ബി.എം.ആന്റ് ബി.സി നിലവാരത്തില്‍ നിര്‍മിക്കുന്ന കാട്ടില്‍കടവ്-ചക്കുവള്ളി റോഡ് എം.സി റോഡുവഴി തേനി ദേശീയപാതയിലേക്ക് ബന്ധിപ്പിക്കുന്നതിനും കഴിയും. ഇതോടെ ഈ റോഡിന് സംസ്ഥാന പദവിയും ലഭിക്കുമെന്ന പ്രതീക്ഷയാണുള്ളതെന്ന് ആര്‍ രാമചന്ദ്രന്‍ എം.എല്‍.എ പറഞ്ഞു.