ദമാം: പാലക്കാട് സ്വദേശി സഊദിയിലെ കിഴക്കന്‍ മേഖലയിലെ ഖഫ്ജിയില്‍ മരിച്ചു. പാലക്കാട് തേങ്കുറുശ്ശി, കയറുംകുളം സിറാജ് വഹാബ് ആണ് ഖഫ്ജിയില്‍ നിര്യാതനായത്. രണ്ടാഴ്ച മുമ്പ് കുളിക്കുന്നതിനിടെ പൊടുന്നനെ പക്ഷാഘാതം സംഭവിച്ച സിറാജിനെ ഖഫ്ജി ജനറല്‍ ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചിരുന്നു. സ്ഥിതി മെച്ചപ്പെട്ടതിനാല്‍ പിന്നീട് വാര്‍ഡിലേക്കു മാറ്റി.

നാട്ടിലെത്തിക്കുന്നതിനു സുഹൃത്തുക്കള്‍ ശ്രമം നടത്തിയിരുന്നു. വിമാനത്തില്‍ സ്‌ട്രെച്ചറില്‍ കിടത്തിക്കൊണ്ടു പോവുന്നതിനു പക്ഷാഘാതം സംഭവിച്ച രോഗികള്‍ക്ക് 15 ദിവസം കഴിയണമെന്നാണ് വ്യവസ്ഥയെന്ന് എയര്‍ലൈന്‍സ് അധികൃതര്‍ അറിയിച്ചിരുന്നു. ഇതിനു വേണ്ടി കാത്തിരിക്കുന്നതിനിടെയാണ് മരണം സംഭവിച്ചതെന്ന് സുഹൃത്തുക്കള്‍ അറയിച്ചു. 30 വര്‍ഷമായി സഊദിയിലുള്ള സിറാജ് വഹാബ് അഞ്ച് മാസം മുമ്പാണ് അവധി കഴിഞ്ഞ് നാട്ടില്‍ നിന്നും എത്തിയത്. ഖഫ്ജിയിലുള്ള സഊദികുവൈത്ത് ഓയില്‍ കമ്പനിയില്‍ ജോലി ചെയ്ത് വരികയായിരുന്നു. ഭാര്യയും ഒരു മകളുമാണുള്ളത്.