കണ്ണൂര്‍: കായലുകളെയും നദികളെയും ഉപയോഗപ്പെടുത്തി ടൂറിസ വികസനത്തിന് ഉത്തര മലബാര്‍ ഒരുങ്ങുന്നു. കണ്ണൂര്‍, കാസര്‍കോട് ജില്ലകളെ ഉള്‍പ്പെടുത്തി 'റിവര്‍ ക്രൂയിസ് ടൂറിസം സര്‍ക്യൂട്ട്' പദ്ധതിക്കാണു നടപടി പുരോഗമിക്കുന്നത്. ഇരു ജില്ലകളിലെയും ജലാശയങ്ങള്‍ ഉപയോഗപ്പെടുത്തിയാണു പദ്ധതി.
ഇതിനു പുറമെ ഉത്തരമലബാറിലെ കലാരൂപങ്ങള്‍, ഗ്രാമീണ ജീവിതം എന്നിവയും പദ്ധതിയില്‍ ഉള്‍ക്കൊള്ളിച്ചിട്ടുണ്ട്. തെയ്യം, കളരിപ്പയറ്റ്, വിളക്ക്, പ്രതിമ, ശില്‍പ നിര്‍മാണം എന്നിവയും പദ്ധതിയില്‍ ഉള്‍പ്പെടും. സംസ്ഥാന സര്‍ക്കാര്‍ നടപ്പാക്കുന്ന ഉത്തരവാദിത്ത ടൂറിസത്തിലൂടെയാണ് റിവര്‍ ക്രൂയിസ് പദ്ധതി നടപ്പാക്കുക.
2016ല്‍ നടന്ന ട്രെയ്ഡ് റിസര്‍ച്ച് സര്‍വേയില്‍ കേരളത്തില്‍ വിദേശ വിനോദസഞ്ചാരികളുടെ കുറവു കണ്ടെത്തിയിരുന്നു. ഈ കുറവു പരിഹരിക്കുന്നതിനാണു വിവിധ പദ്ധതികള്‍ ടൂറിസം രംഗത്തു നടപ്പാക്കുന്നത്.  റിവര്‍ ക്രൂയിസ് ടൂറിസത്തില്‍ ഗ്രാമീണ മേഖലയിലെ വികസനത്തിനൊപ്പം പ്രത്യക്ഷവും പരോക്ഷവുമായും തൊഴില്‍ അവസരങ്ങളും സൃഷ്ടിക്കപ്പെടും. പരീക്ഷണാടിസ്ഥാനത്തിലാണു നദീതീര ടൂറിസം പദ്ധതി ജില്ലകളില്‍ നടപ്പാക്കുന്നത്. തുടര്‍ന്നു മറ്റു ജില്ലകളിലേക്കും റിവര്‍ ക്രൂയിസ് ടൂറിസം വ്യാപിപ്പിക്കും.
ഇതിനു പുറമെ പരമ്പരാഗത വിനോദസഞ്ചാരം, തീര്‍ഥാടന ടൂറിസം പദ്ധതികള്‍ എന്നിവക്കും ഊന്നല്‍ നല്‍കിയിട്ടുണ്ട്. കണ്ണൂരിലെ ധര്‍മടം-മുഴുപ്പിലങ്ങാട്, വളപട്ടണംപുഴ, കുപ്പം പുഴ, തലശ്ശേരി പുഴ, പഴശി ഡാം, വെള്ളിക്കീല്‍ എന്നിവയും കാസര്‍കോട് ജില്ലയിലെ ചീമേനി പുഴ, കാര്യങ്കോട് പുഴ, കവ്വായി, ഉപ്പള കായല്‍, ഷിറിയ നദി, എന്നിവയും ബന്ധിപ്പിച്ചാണു പദ്ധതി നടപ്പാക്കുന്നത്.