എടപ്പാള്‍: പൊന്നാനി ബ്ലോക്ക് പഞ്ചായത്തിന്റെ 2017-18 വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന 5.95 കോടി രൂപയുടെ പദ്ധതികള്‍ക്ക് ജില്ലാ ആസൂത്രണ സമിതി അംഗീകാരമായി. 14 സ്പില്‍ഓവര്‍ പദ്ധതികളും 67 പുതിയ പദ്ധതികളും ഉള്‍പ്പെടെ ആകെ 81 പദ്ധതികള്‍ക്കാണ് അംഗീകാരമായത്.
പ്ലാന്‍ ഫണ്ട് ഇനത്തില്‍ ജനറല്‍ വിഭാഗത്തില്‍ 2.06 കോടി രൂപയുടെയും എസ്.സി വിഭാഗത്തില്‍ 1.55 കോടി രൂപയുടെയും പദ്ധതികളാണ് നടപ്പാക്കുന്നത്. 1.53 കോടി രൂപ ചെലവഴിച്ച് പട്ടികജാതി കോളനികളില്‍ ഉള്‍പ്പെടെ 24 കുടിവെള്ള പദ്ധതികള്‍ ഈ വര്‍ഷം നടപ്പിലാക്കും. പി.എം.എ.വൈ ഭവന പദ്ധതിയിലുള്‍പ്പെടുത്തി 120 വീടുകള്‍, 8.47 ലക്ഷം രൂപ ചെലവില്‍ ശാരീരിക മാനസിക വെല്ലുവിളികള്‍ നേരിടുവര്‍ക്ക് സ്‌കോളര്‍ഷിപ്പ്, പട്ടികജാതി യുവാക്കള്‍ക്ക് വിദേശത്ത് ജോലിക്ക് പോകുന്നതിന് ധനസഹായം (10 ലക്ഷം), തവനൂര്‍ മഹിളാമന്ദിരത്തില്‍ സൗരോര്‍ജ്ജ വൈദ്യുതി ഉല്‍പാദന യൂനിറ്റ് (15 ലക്ഷം), വയോജനങ്ങള്‍ക്ക് പകല്‍വീട്, അങ്കണവാടികള്‍ക്ക് സ്ഥലംവാങ്ങല്‍, വിവിധ പാടശേഖരങ്ങള്‍ക്ക് വൈദ്യുതി ലൈന്‍ നീട്ടല്‍ തുടങ്ങീ പദ്ധതികളാണ് നടപ്പാക്കുന്നത്.
മാലിന്യനിര്‍മാര്‍ജന പദ്ധതിയുടെ ഭാഗമായി 10 ലക്ഷം രൂപ ചെലവില്‍ പട്ടികജാതി കോളനികളിലെ വീടുകള്‍ക്കായി വേസ്റ്റ് കുഴികള്‍, എടപ്പാള്‍, തൃക്കണാപുരം സി.എച്ച്.സികളില്‍ ഇന്‍സിനറേറ്റര്‍ (ഒന്‍പത് ലക്ഷം), തവനൂര്‍ മഹിളാമന്ദിരത്തില്‍ കക്കൂസ് മാലിന്യസംസ്‌കരണ പ്ലാന്റ് (7.75 ലക്ഷം) എന്നിവ സ്ഥാപിക്കും. കൂടാതെ ഗ്രാമപഞ്ചായത്തുകളുമായി സംയോജിച്ച് നെല്ല്-പച്ചക്കറി കര്‍ഷകര്‍ക്ക് കൂലി ചെലവ് സബ്‌സിഡി,ക്ഷീരകര്‍ഷകര്‍ക്ക് പാലിന് സബ്‌സിഡി എന്നിവയും നടപ്പാക്കും.