കോട്ടയം: വൈദ്യുതി കൊണ്ടുവരുന്നതിനും പ്രസരണത്തിനുമായുള്ള ട്രാന്‍സ്ഗ്രിഡ് പദ്ധതിയുടെ മറവില്‍ കോടികളുടെ അഴിമതിയെന്ന് പ്രതിപക്ഷ നേതാവ് രമേശ് ചെന്നിത്തല.
ട്രാന്‍സ്ഗ്രിഡ് പദ്ധതി കിഫ്ബി വഴി നടപ്പാക്കുമെന്നായിരുന്നു പ്രഖ്യാപിച്ചിരുന്നത്. കോട്ടയം ലൈന്‍സ്, കോലത്തുനാട് പദ്ധതികളില്‍ ദുരൂഹമായ ഇടപാടുകളാണ് നടന്നിരിക്കുന്നത്. കെ.എസ്.ഇ.ബിയുടെ അടിസ്ഥാന നിരക്കിനെക്കാള്‍ വളരെ ഉയര്‍ന്ന നിരക്കിലാണ് ഇവയുടെ കരാര്‍ നല്‍കിയിരിക്കുന്നത്.
കെ.എസ്.ഇ.ബിയിലെ എസ്റ്റിമേറ്റുകള്‍ സാധാരണഗതിയില്‍ അസിസ്റ്റന്റ് എന്‍ജിനീയര്‍ മുതല്‍ ചീഫ് എന്‍ജിനീയര്‍ വരെയുള്ള ഉദ്യോഗസ്ഥരെ ഉള്‍പ്പെടുത്തിയാണ് തയാറാക്കുക. എന്നാല്‍, ഈ പ്രവൃത്തികളുടെ എസ്റ്റിമേറ്റ് പ്രത്യേകം നിയോഗിക്കപ്പെട്ട ചീഫ് എന്‍ജിനീയറാണ് തയാറാക്കിയതെന്നും അദ്ദേഹം പറഞ്ഞു.