അമ്പലപ്പുഴ: ആലപ്പുഴ മെഡിക്കല്‍ കോളജ് ആശുപത്രിയില്‍ ജീവതാള പുനരുജ്ജീവന പരിശീലന പരിപാടിക്ക് തുടക്കമായി. കുഴഞ്ഞുവീഴുന്ന രോഗിയുടെ ഹൃദയതാളം വീണ്ടെടുക്കാന്‍ ആരോഗ്യ പ്രവര്‍ത്തകര്‍ക്കു നല്‍കുന്ന പരിശീലന പരിപാടിയാണിത്. കേരള ഗവ മെഡിക്കല്‍ കോളേജ് ടീച്ചേഴ്‌സ് അസോ. ജില്ലാഘടകമാണ് അനസ്‌തേഷ്യാ വിഭാഗത്തിന്റെ സഹകരണത്തോടെ ഇതിന് തുടക്കമിട്ടിരിക്കുന്നത്. ആഴ്ചയില്‍ ഒരുദിവസമെന്നരീതിയില്‍ ഘട്ടം ഘട്ടമായി ആശുപത്രിയിലെ മുഴുവന്‍ ജീവനക്കാര്‍ക്കും ഇതിന്റെ പരിശീലനം നല്‍കും.
രണ്ടാം ഘട്ടമായി ഓട്ടോറിക്ഷ, ടാക്‌സി ഡ്രൈവര്‍മാര്‍, ട്രാഫിക് പോലീസുകാര്‍ എന്നിവര്‍ക്കും പരിശീലനം നല്‍കും. ആരോഗ്യ സര്‍വകലാശാല സെനറ്റംഗം ഡോ പി എസ് ഷാജഹാന്‍ ഇതിന്റ ഉദ്ഘാടനം നിര്‍വഹിച്ചു. ഡോ ആര്‍ പ്രഭാഷ്, ഡോ സന്തോഷ് സുരേന്ദ്രന്‍, ഡോ. വീണ എന്‍ എന്നിവര്‍ പങ്കെടുത്തു.