എടപ്പാള്‍: റോഡരികുകളിലും വയലുകളിലും മാലിന്യം തള്ളുന്നത് പതിവായതോടെ നാട്ടുകാര്‍ ദുരിതത്തില്‍. മേഖലയില്‍ സംസ്ഥാന പാതയില്‍ കണ്ടനകം, വലിയ പാലം, നീലിയാട് തുടങ്ങിയ പ്രദേശങ്ങളിലാണ് മാലിന്യങ്ങള്‍ തള്ളുന്നത് പതിവായത്.
കടകളിലെ മാലിന്യങ്ങളും കോഴിയവശിഷ്ടങ്ങളും മറ്റുമാണ് പ്രധാനമായി തള്ളുന്നത്. മഴ ആരംഭിച്ചതോടെ ഈ മാലിന്യങ്ങള്‍ അഴുകി ഒലിച്ചിറങ്ങുന്ന അവസ്ഥയിലായി. ഇത് ഗുരുതര ആരോഗ്യപ്രശ്‌നങ്ങള്‍ സൃഷ്ടിക്കുമെന്ന് നാട്ടുകാര്‍ ആരോപിച്ചു. വയലുകളില്‍ മാലിന്യങ്ങള്‍ തള്ളുന്നത് കൃഷിയെടുക്കുന്നതിന് പോലും ബുദ്ധിമുട്ട് സൃഷ്ടിക്കുന്നു. നീലിയാട്ടില്‍ ദിവസങ്ങള്‍ക്ക് മുന്‍പ് ശുചിമുറി മാലിന്യവും റോഡരികിലെ വയലില്‍ തള്ളിയിരുന്നു.
സമീപത്തെ വയലിലേക്ക് മാലിന്യം ഒഴുകിയെത്തിയതോടെ കൃഷിയിറക്കാന്‍ പോലും കഴിയാതെ കര്‍ഷകര്‍ ബുദ്ധിമുട്ടിയിരുന്നു. വ്യാപാര സ്ഥാപനങ്ങളില്‍ നിന്നും മാലിന്യങ്ങള്‍ സംസ്‌കരിക്കുന്നതിനായി ശേഖരിക്കുന്ന സംഘങ്ങളാണ് ഇത്തരത്തില്‍ മാലിന്യങ്ങള്‍ തള്ളുന്നതെന്ന് നാട്ടുകാര്‍ ആരോപിക്കുന്നു. അറവ് മാലിന്യങ്ങള്‍ തള്ളുന്നത് തെരുവ് നായ ശല്യം കൊണ്ട് പൊറുതിമുട്ടുന്ന മേഖലയില്‍ പ്രശ്‌നം കൂടുതല്‍ രൂക്ഷമാക്കാിനിടയാക്കിയിട്ടുണ്ട്. മാലിന്യങ്ങള്‍ തള്ളുന്നത് തുടര്‍ന്നാല്‍ പ്രതിരോധ നടപടികള്‍ സ്വീകരിക്കാനുള്ള ഒരുക്കത്തിലാണ് നാട്ടുകാര്‍.