വടകര: മൂന്നുലക്ഷം രൂപ വിലവരുന്ന ലഹരി വസ്തുക്കള്‍ എക്‌സൈസ് പിടികൂടി. മലപ്പുറം താനൂര്‍ തയ്യാല തയ്യുള്ളതില്‍ സൈതലവി(51), ഉത്തര്‍പ്രദേശ് കോട്ട നാഗള അമ്ര സ്വദേശി രാധാചരണ്‍(28) എന്നിവരെയാണു പിടികൂടിയത്.
കോഴിക്കോട്-കണ്ണൂര്‍ റൂട്ടിലോടുന്ന സ്വകാര്യ ബസില്‍ അഴിയൂര്‍ എക്‌സൈസ് ചെക്‌പോസ്റ്റില്‍ പരിശോധനയ്ക്കിടെയാണു ലഹരി വസ്തുക്കള്‍ പിടികൂടിയത്.
സീറ്റിനടിയില്‍ ഒളിപ്പിച്ചുവച്ച നിലയിലായിരുന്നു ഇത്. ലഹരി വസ്തുക്കള്‍ മംഗളൂരുവില്‍ നിന്ന് മലപ്പുറം, താനൂര്‍, കുന്ദമംഗലം എന്നിവിടങ്ങളിലേക്കു കടത്തുകയായിരുന്നുവെന്നു പിടിയിലായവര്‍ പറഞ്ഞു.
പുകയില ഉല്‍പന്നങ്ങളുടെ രൂക്ഷഗന്ധം തടയാന്‍ വെളുത്തുള്ളി ചതച്ചെടുത്തു നീരു തളിച്ചാണു കടത്തിയിരുന്നത്. എക്‌സൈസ് ഇന്‍സ്‌പെക്ടര്‍ പി.പി വേണുവിന്റെ നേതൃത്വത്തിലുള്ള സംഘമാണു പ്രതികളെ പിടികൂടിയത്.