കായംകുളം: ഓടിക്കൊണ്ടിരുന്ന സ്‌കൂട്ടറിന് തീപിടിച്ചു. യാത്രക്കാരന്‍ ഇറങ്ങിയോടിയതിനാല്‍ ദുരന്തം ഒഴിവായി. കെട്ടിട നിര്‍മ്മാണ തൊഴിലാളിയായ കാപ്പില്‍ കിഴക്ക് അക്ഷയ ഭവനത്തില്‍ അനില്‍ കുമാറിന്റെ സ്‌കൂട്ടറാണ് കത്തിനശിച്ചത്. കൃഷ്ണപുരം പനയന്നാര്‍കാവ് ജങ്ഷനു സമീപം ഇന്നലെ രാവിലെ 8.30 തിനായിരുന്നു അപകടം. ജോലിക്ക് സ്‌കൂട്ടറില്‍ പോകവെ അതു വഴി വന്ന സ്‌കൂള്‍ വിദ്യാര്‍ത്ഥികള്‍ സ്‌കൂട്ടറിന് പിന്നില്‍ തീപിടിച്ചതു കണ്ട് ബഹളം വച്ചു. ഇത് കണ്ട അനില്‍കുമാര്‍ സ്‌കൂട്ടര്‍ നിര്‍ത്തി ചാടിയിറങ്ങി. അപ്പോഴേക്കും തീ ആളിക്കത്തി. നാട്ടുകാര്‍ ഓടിയെത്തി തീ അണച്ചെങ്കിലും സ്‌കൂട്ടര്‍ പൂര്‍ണമായും കത്തിനശിച്ചു.