പെരിങ്ങത്തൂര്‍: ടൗണില്‍ തെരുവുനായ ശല്യം വീണ്ടും രൂക്ഷമാവുന്നു. ചൊക്ലി, പെരിങ്ങത്തൂര്‍, കരിയാട്, മേക്കുന്ന് പ്രദേശങ്ങളില്‍ തെരുവുനായ റോഡ് കയ്യടക്കുന്നത് വാഹന യാത്രക്കാര്‍ക്കും, കാല്‍നട യാത്രക്കാര്‍ക്കും ബുദ്ധിമുട്ടുണ്ടാക്കുകയാണ്. തെരുവ് നായ്ക്കള്‍ കുറുകെ ഓടുന്നതിനാല്‍ ഇരുചക്ര വാഹനങ്ങളില്‍ പോകുന്നവര്‍ അപകടത്തില്‍പ്പെടുന്നതും പതിവാണ്. മാസങ്ങള്‍ക്കു മുമ്പ് രണ്ട് മദ്‌റസ വിദ്യാര്‍ഥികള്‍ തെരുവു നായയുടെ കടിയേറ്റ് ചികിത്സ നേടിയിരുന്നു. കഴിഞ്ഞ ദിവസം കടവത്തൂരില്‍ സ്‌കൂള്‍ വിദ്യാര്‍ഥിനിയും, ചൊക്ലിയില്‍ മധ്യവയസ്‌ക്കയും തെരുവു നായയുടെ കടിയേറ്റ് ചികിത്സയിലാണ്. നായ്ക്കളെ ഭയന്ന് വീടുകളില്‍ നിന്നും കുട്ടികളെ പുറത്തിറക്കാന്‍ പറ്റാത്ത അവസ്ഥയാണുള്ളത്. വര്‍ധിച്ചു വരുന്ന തെരുവുനായ ശല്യത്തിനെതിരേ നടപടി എടുക്കണമെന്നാണ് നാട്ടുകാരുടെ ആവശ്യം.