കൊളംബോ: ആസ്‌ത്രേലിയക്കെതിരായ മൂന്നു മത്സരങ്ങളുടെ ടെസ്റ്റ് പരമ്പര ശ്രീലങ്ക 2-0ന് സ്വന്തമാക്കി. രണ്ടാം ടെസ്റ്റില്‍ 229 റണ്‍സിന്റെ വമ്പന്‍ ജയമാണ് ലങ്ക സ്വന്തമാക്കിയത്. ടെസ്റ്റ് റാങ്കിങില്‍ ഒന്നാം റാങ്കുകാരായ കങ്കാരുക്കള്‍ പൊരുതാന്‍ പോലും നില്‍ക്കാതെയാണ് കീഴടങ്ങിയത്. ഏഷ്യന്‍ ഭൂഖണ്ഡത്തില്‍ ആസ്‌ത്രേലിയയുടെ തുടര്‍ച്ചയായ എട്ടാം തോല്‍വിയാണിത്. അതേസമയം ഏഷ്യയില്‍ ഓസീസിന്റെ തുടര്‍ച്ചയായ മൂന്നാം പരമ്പര നഷ്ടവുമാണിത്.
മൂന്നാം ദിനം മൂന്നിന് 25 എന്ന നിലയില്‍ ബാറ്റിങ് പുനരാരംഭിച്ച ആസ്‌ത്രേലിയ 183 റണ്‍സിന് പുറത്താവുകയായിരുന്നു. ഡേവിഡ് വാര്‍ണര്‍(41) പൊരുതി നോക്കിയെങ്കിലും ഫലം കണ്ടില്ല. സ്റ്റീവന്‍ സ്മിത്ത്(30) ആദം വോഗ്‌സ്(28) മിച്ചല്‍ മാര്‍ഷ്(18) പീറ്റര്‍ നെവില്‍(24) മിച്ചല്‍ സ്റ്റാര്‍ക്(26) എന്നിവര്‍ക്ക് മികച്ച തുടക്കം കിട്ടിയെങ്കിലും വമ്പന്‍ സ്‌കോര്‍ നേടാനായില്ല.
23 ഓവറില്‍ 70 റണ്‍സ് വഴങ്ങി ആറു വിക്കറ്റെടുത്ത ദില്‍രുവാന്‍ പെരേരയാണ് ഓസീസിനെ ചുരുട്ടി കെട്ടിയത്. ഹെറാത്ത് രണ്ടു വിക്കറ്റെടുത്തു. പെരേര രണ്ടിന്നിങ്‌സിലുമായി 10 വിക്കറ്റെടുത്തു. രണ്ടാമിന്നിങ്‌സില്‍ താരം അര്‍ധ സെഞ്ച്വറി നേടുകയും ചെയ്തിരുന്നു. പെരേര തന്നെയാണ് മത്സരത്തിലെ താരം.