കോഴിക്കോട്: മാവോയിസ്റ്റ് ലഘുലേഖ വിതരണം ചെയ്തതിന് സി.പി.എം പ്രവര്‍ത്തകരെ അറസ്റ്റ് ചെയ്ത സര്‍ക്കാരിന്റെ നടപടിക്കെതിരേ പ്രതിപക്ഷ നേതാവ് രമേശ് ചെന്നിത്തല. സര്‍ക്കാരിന്റേത് കിരാതനടപടിയെന്ന് ചെന്നിത്തല ചൂണ്ടിക്കാട്ടി. ഇതിന് മുന്‍പും ലഘുലേഖ വിതരണം ചെയ്തിട്ടുണ്ട് എന്നാല്‍ അന്നൊന്നും സര്‍ക്കാര്‍ ഇത്തരം നടപടി കൈക്കൊണ്ടില്ലെന്ന് അദ്ദേഹം കുറ്റപ്പെടുത്തി. 

മാവോയിസ്റ്റ് വെടിവയ്പ്പുമായി ബന്ധപ്പെട്ട് സിപിഎമ്മും സര്‍ക്കാറും നിലപാട് വ്യക്തമാക്കാന്‍ തയ്യാറാകാത്തത് കള്ളക്കളിയാണ്. ഒരു കമ്യൂണിസ്റ്റ് മുഖ്യമന്ത്രിക്ക് ചേരുന്ന നടപടികളല്ല പിണറായി വിജയെന്റെ ഭാഗത്തു നിന്ന് ഉണ്ടാകുന്നതെന്നും രമേശ് ചെന്നിത്തല കുറ്റപ്പെടുത്തി.

മാവോയിസ്റ്റ് വേട്ടക്കെതിരെ ലഘുലേഖ വിതരണം ചെയ്തതില്‍ മാവോയിസ്റ്റ് ബന്ധം ആരോപിച്ച് അലന്‍ ഷുഹൈബ്, താഹ ഫസല്‍ എന്നീ വിദ്യാര്‍ഥികളാണ് അറസ്റ്റിലായത്.  ഇരുവര്‍ക്കുമെതിരെ നിയമ വിരുദ്ധ പ്രവര്‍ത്തന നിയമം (യു.എ.പി.എ)ചുമത്തിയിട്ടുണ്ട്. രണ്ടുപേരും സി.പി.എം പ്രവര്‍ത്തകരാണ്. ഇന്നലെ വൈകീട്ടോടെ പന്തീരങ്കാവില്‍ വെച്ചാണ് ഇരുവരേയും അറസ്റ്റ് ചെയ്തത്.