റായ്പൂര്‍: ഛത്തിസ്ഗഡില്‍ സുരക്ഷാ സേനയും മാവോ വാദികളും തമ്മിലുണ്ടായ ഏറ്റുമുട്ടലില്‍ മൂന്ന് സൈനികരും 12 മാവോവാദികളും കൊല്ലപ്പെട്ടു. കഴിഞ്ഞ ദിവസം മാവോ വാദികള്‍ സൈന്യത്തിനു നേരെ നടത്തിയ ആക്രമണത്തിന്റെ പശ്ചാത്തലത്തില്‍ ഛത്തിസ്ഗഡിലെ സുക്മയില്‍ നടത്തിയ ഓപറേഷന്‍ പ്രഹാര്‍ എന്നു പേരിട്ട തിരച്ചിലിലാണ് ഏറ്റുമുട്ടലുണ്ടായതെന്ന് മാവോ വാദി വേട്ടക്കായി നിയോഗിച്ച ദൗത്യസേനയുടെ ഡയരക്ടര്‍ ജനറല്‍ ഡി.എം അശ്വതി അറിയിച്ചു.
മരിച്ച മൂന്ന് ദൗത്യസേനാംഗങ്ങളും ജില്ലാ റിസര്‍വ് ഗ്രൂപ്പ് അംഗങ്ങളാണ്. അഞ്ച് സേനാംഗങ്ങള്‍ക്ക് പരുക്കേല്‍ക്കുകയും ചെയ്തിട്ടുണ്ട്.
സുരക്ഷാ സേനയുടെ ശക്തമായ നടപടിയില്‍ 12 മാവോ വാദികളാണ് കൊല്ലപ്പെട്ടത്. 10 പേര്‍ക്ക് പരുക്കേറ്റതായും വിവരം ലഭിച്ചതായി ദൗത്യസേനയുടെ ഡയരക്ടര്‍ ജനറല്‍ അറിയിച്ചു.
മാവോവാദികളെ പിടികൂടുന്നതിനായി പ്രദേശത്ത് 1500 സുരക്ഷാ സേനയെ നിയോഗിച്ച് നടത്തിയ ഓപറേഷന്‍ ഏതാണ്ട് 56 മണിക്കൂര്‍ നീണ്ടുനിന്നു. ശനിയാഴ്ച തുടങ്ങിയ തിരച്ചില്‍ ഇന്നലെയാണ് അവസാനിച്ചത്. ഏതാണ്ട് 12 മണിക്കൂര്‍ നേരം തുടര്‍ച്ചയായി പരസ്പരം വെടിവയ്പുനടന്നതായും ഡയരക്ടര്‍ ജനറല്‍ പറഞ്ഞു.
സ്‌പെഷല്‍ ടാസ്‌ക് ഫോഴ്‌സ്, ജില്ലാ റിസര്‍വ് ഗ്രൂപ്പ്, സി.ആര്‍.പി.എഫ്, കോബ്ര യൂനിറ്റ് എന്നിവര്‍ സംയുക്തമായാണ് തിരച്ചില്‍ നടത്തിയത്. ബസ്തറില്‍ നിന്ന് 500 കി.മീറ്റര്‍ മാറി ചിന്ദഗുഫ പ്രദേശത്തായിരുന്നു ഏറ്റുമുട്ടല്‍. ബിജാപൂരില്‍ ഉണ്ടായ സ്‌ഫോടനത്തില്‍ രണ്ട് കോബ്രാ സേനാംഗങ്ങള്‍ക്ക് പരുക്കേറ്റിട്ടുണ്ട്. ദൗത്യം കഴിഞ്ഞ് മടങ്ങുമ്പോഴായിരുന്നു സ്‌ഫോടനമുണ്ടായത്.