തിരുവനന്തപുരം: ഇന്ത്യന്‍ മെഡിക്കല്‍ അസോസിയേഷന്റെ ഈ വര്‍ഷത്തെ മാധ്യമ അവാര്‍ഡുകള്‍ പ്രഖ്യാപിച്ചു. സമൂഹമാധ്യമ അവാര്‍ഡിന് പാലക്കാട് അവൈറ്റിസ് ഹോസ്പിറ്റലിലെ നവജാത ശിശുരോഗ വിദഗ്ധയായ ഡോ. സൗമ്യ സരിന്‍ അര്‍ഹയായി. വിഷ്വല്‍ മീഡിയയില്‍ മഞ്ജുഷ ജോര്‍ജ് ( മാതൃഭൂമി ന്യൂസ്), പ്രിന്റ് മീഡിയയില്‍ എം. ജഷീന (ദേശാഭിമാനി, കോഴിക്കോട്) എന്നിവരും അര്‍ഹരായി. അന്‍പതിനായിരം രൂപയും ഫലകവും പ്രശസ്തി പത്രവും അടങ്ങുന്നതാണ് അവാര്‍ഡ്. പ്രോത്സാഹന സമ്മാനം അനു എബ്രഹാമിനും (മാതൃഭൂമി) ലഭിച്ചു. അവാര്‍ഡുകള്‍ 9, 10 തിയതികളില്‍ തൊടുപുഴയില്‍ നടക്കുന്ന ഐ.എം.എ സംസ്ഥാന സമ്മേളനത്തില്‍ വിതരണം ചെയ്യും. പുതിയ സംസ്ഥാന ഭാരവാഹികളായ ഡോ. അബ്രഹാം വര്‍ഗീസ് (പ്രസിഡന്റ്), ഡോ. പി. ഗോപികുമാര്‍ (സെക്രട്ടറി), ഡോ. ലളിത് സുന്ദരം (ട്രഷറര്‍) തുടങ്ങിയവരുടെ ചുമതലയേറ്റെടുക്കലും സമ്മേളനത്തില്‍ നടക്കുമെന്ന് ഐ.എം.എ സംസ്ഥാന പ്രസിഡന്റ് ഡോ. എം.ഇ സുഗതന്‍, സെക്രട്ടറി ഡോ. എന്‍. സുള്‍ഫി എന്നിവര്‍ അറിയിച്ചു.