പത്തനംതിട്ട: ശബരിമല സന്നിധാനത്ത് 52 കാരിയെ ആക്രമിച്ച കേസില്‍ ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്റെ ജാമ്യാപേക്ഷ  കോടതി വീണ്ടും നിരസിച്ചു. റാന്നി ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയാണ് ജാമ്യാപേക്ഷ തള്ളിയത്.

വധശ്രമത്തോട് അനുബന്ധിച്ചുള്ള ഗൂഢാലോചനയായതിനാൽ ജാമ്യം അനുവദിക്കാനാകില്ല എന്ന് കോടതി വ്യക്തമാക്കി. സുരേന്ദ്രനെ ചോദ്യം ചെയ്യാന്‍ പൊലിസിന്‌ കോടതി ഒരു മണിക്കൂര്‍ സമയം അനുവദിച്ചിട്ടുണ്ട്.

ശബരിമലയിലുണ്ടായ അക്രമങ്ങളില്‍ സുരേന്ദ്രന്റെ പങ്ക് തെളിയിക്കുന്ന ദൃശ്യങ്ങള്‍ നല്‍കാമെന്നും പൊലിസ് കോടതിയില്‍ അറിയിച്ചു.

അസുഖമുണ്ടെന്നത് തെളിയിക്കുന്ന രേഖകള്‍ ഒന്നും സുരേന്ദ്രന്‍ ഹാജരാക്കിയില്ലെന്നും പ്രോസിക്യൂഷന്‍ വ്യക്തമാക്കി. അതേസമയം, പ്രതിഭാഗത്തിന്റെ ആവശ്യപ്രകാരം കെ.സുരേന്ദ്രന് ജയില്‍ സൂപ്രണ്ടിന്റെ സാന്നിധ്യത്തില്‍ ബന്ധുക്കളെ ഫോണില്‍ വിളിക്കുന്നതിന് കോടതി അനുമതി നല്‍കി.

ചിത്തിര ആട്ടവിശേഷത്തില്‍ 52കാരിയെ തടഞ്ഞസംഭവത്തില്‍ കെ. സുരേന്ദ്രന്‍ ഗുഢാലോചന നടത്തിയെന്ന് കാണിച്ചാണ് പൊലിസ് കേസ് രജിസ്റ്റര്‍ ചെയ്തിരുന്നത്. കെ. സുരേന്ദ്രന് പുറമേ ബി.ജെ.പി നേതാവ് വി.വി. രാജേഷ്, ആര്‍.എസ്.എസ്. നേതാവ് വത്സന്‍ തില്ലങ്കേരി, യുവമോര്‍ച്ച സംസ്ഥാന പ്രസിഡന്റ് പ്രകാശ് ബാബു എന്നിവര്‍ക്കെതിരെയും കേസെടുത്തിരുന്നു.