കരുണാമയം തിരുനബിതന്‍ സന്ദേശങ്ങള്‍
അകളങ്കിത സ്‌നേഹത്തിന്റെയാശ്വാസപ്പൂക്കള്‍.
മധുരം പുണ്യോദാരം ധന്യാത്മന്‍ തവ ജന്മം
മഹിതം വിമോചന കാരണം ഭക്തിപ്രദം,
ഏകനാഥനിലെന്നുമര്‍പ്പിതം ഭക്തിപ്രദം
നീതി തന്‍ നിറകുടം അന്തിമം പ്രവാചകം.
ദാനധര്‍മ്മത്തില്‍ സത്യ ദര്‍ശനം, വ്രത നിഷ്ഠാ
പാലനം അവസാന നാളിന്റെ വിചിന്തനം.
മഹനീയതയുടെ മൂര്‍ത്തമാം പ്രഭാവമേ
മഹിതം ജന്മത്താലേ ധന്യമീ മഹീതലം,
അജ്ഞത യനാചാര മത്യാചാരാദികളാല്‍
ഗ്രസ്തമീ സമൂഹത്തെ നയിച്ച മഹാഗുരോ,
കാലത്തിന്‍ മഹനീയ ദര്‍ശന പഥം നിത്യ
സാരമായ് പ്രവാചക നാമത്താല്‍ ജ്വലിക്കാവൂ