കൊച്ചി: വാളയാറില്‍ പീഡനത്തിനിരയായ സഹോദരിമാരായ രണ്ട് ദലിത് പെണ്‍കുട്ടികളെ മരിച്ച നിലയില്‍ കണ്ട സംഭവത്തിലെ പ്രതികളെ വെറുതെ വിട്ടതിനെതിരേ മാതാവ് മൂന്ന് ഹരജികള്‍ കൂടി നല്‍കി. ഒന്‍പതു വയസുകാരിയുടെ ദുരൂഹ മരണത്തെത്തുടര്‍ന്ന് രജിസ്റ്റര്‍ ചെയ്ത കേസിലെ പ്രതി വലിയ മധുവെന്ന മധു, 13 വയസുകാരിയുടെ ദുരൂഹ മരണക്കേസിലെ പ്രതികളായ മധുവെന്ന കുട്ടി മധു, ഷിബു എന്നിവരെ പാലക്കാട് പോക്‌സോ കോടതി വെറുതെ വിട്ടതിനെതിരേയാണ് പുതിയ മൂന്ന് അപ്പീല്‍ ഹരജികള്‍ ഇന്നലെ നല്‍കിയത്.
ഒന്‍പതു വയസുകാരിയുടെ ദുരൂഹ മരണ കേസിലെ പ്രതിയായ പ്രദീപ് കുമാര്‍, 13 വയസുകാരിയുടെ കേസിലെ പ്രതിയായ വലിയ മധു എന്നിവരെ വെറുതെ വിട്ടതിനെതിരേ ചൊവ്വാഴ്ച രണ്ട് ഹരജികള്‍ മാതാവ് നല്‍കിയിരുന്നു.
ഇനി ഒരു കേസില്‍ കൂടി അപ്പീല്‍ നല്‍കാനുണ്ട്. രണ്ട് കുട്ടികളുടെയും മരണം സംബന്ധിച്ച കേസുകള്‍ വ്യത്യസ്തമായി വിധി പറഞ്ഞതിനാലാണ് അപ്പീലുകളും പലതായി സമര്‍പ്പിച്ചത്. അറ് അപ്പീലുകളാണ് കേസുമായി ബന്ധപ്പെട്ട് നല്‍കുന്നത്.