വടക്കാഞ്ചേരി: ജില്ലയുടെ വിവിധ ഭാഗങ്ങളിലെ 25 സ്ഥാപനങ്ങളില്‍ നിന്നും മുക്കുപണ്ടം പണയം വച്ച് പണം തട്ടിയ ഇരുപതു വയസുകാരന്‍ ഉള്‍പ്പടെയുള്ള മൂന്നംഗ സംഘത്തെ വടക്കാഞ്ചേരി പൊലിസ് പിടികൂടി.
പാങ്ങ് സ്വദേശികളായ രാമനത്ത് അബൂബക്കര്‍ (20), കട്ടാട്ട് ഷിതിന്‍(24), രായ്മരക്കാര്‍ മുഹമ്മദ് സാഹിര്‍ (24) എന്നിവരെയാണ് ഹൗസ് സ്റ്റേഷന്‍ ഓഫിസര്‍ പി. എസ്. സുരേഷ്, എസ്.ഐ. കെ. സി. രതീഷ് എന്നിവരുടെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
പണയം വയ്ക്കാന്‍ ഉപയോഗിച്ചിരുന്ന മുക്കുപണ്ടങ്ങളില്‍ 916 മുദ്ര പതിപ്പിച്ചായിരുന്നു പണം തട്ടിയിരുന്നത്. വാടകക്കെടുത്ത കാറില്‍ ചുറ്റി സഞ്ചരിച്ചായിരുന്നു തട്ടിപ്പ് . പത്താംകല്ലിലുള്ള രൂപ ഫൈനാന്‍സില്‍ 4 വളകള്‍ വച്ച് 80000 രൂപ തട്ടിയ കേസിലെ പരാതിയെതുടര്‍ന്നുള്ള അന്വേഷണത്തിന് ഒടുവിലാണ് ഇവര്‍ പിടിയിലായത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.