തലശ്ശേരി: പൊതുവഴി കൈയേറി റോഡ് നിര്‍മിക്കുകയും പരാതിക്കാരിയുടെ വഴി തടസപ്പെടുത്തുകയും ചെയ്ത സംഭവത്തില്‍ കതിരൂര്‍ ഗ്രാമപഞ്ചായത്ത് സെക്രട്ടറിക്കെതിരേ അന്വേഷണം നടത്താന്‍ തലശ്ശേരി സ്‌പെഷ്യല്‍ വിജിലന്‍സ് കോടതി ഉത്തരവിട്ടു.
കണ്ണൂര്‍ വിജിലന്‍സ് ഡിവൈ.എസ്.പിക്കാണ് അന്വേഷണ ചുമതല. കതിരൂര്‍ കക്കറയിലെ ശ്രേയസില്‍ സുരേന്ദ്രന്റെ ഭാര്യ കെ.സരിത നല്‍കിയ പരാതിയെ തുടര്‍ന്നാണ് കോടതി ഉത്തരവ്. 2016 ഒക്ടോബര്‍ 27ന് പരാതിക്കാരിയുടെ വീടിനു മുന്‍പിലെ  റോഡില്‍ വഴി തടസപ്പെടുത്തി അയല്‍വാസി മതില്‍ കെട്ടുകയായിരുന്നു. ഇതു സംബന്ധിച്ച് സരിത പരാതി നല്‍കിയെങ്കിലും 2016 ഡിസംബര്‍ 27ന് മതില്‍ നിര്‍മാണത്തിന് പഞ്ചായത്ത് സെക്രട്ടറി അനധികൃതമായി അനുമതി നല്‍കുകയും ചെയ്തു. ഇതിനെ ചോദ്യം ചെയ്താണ് സരിത അഡ്വ.എം.സജിത മുഖേന വിജിലന്‍സ് കോടതിയെ സമീപിച്ചത്. പരാതി പരിഗണിച്ച ജഡ്ജ് കെ. ബൈജുനാഥ് സെക്രട്ടറിക്കെതിരേ ത്വരിതാന്വേഷണത്തിന് ഉത്തരവിടുകയായിരുന്നു.