തൊട്ടില്‍പ്പാലം: ലോകഹിരോഷിമ ദിനത്തോടനുബന്ധിച്ച് കായക്കൊടി ഹൈസ്‌കൂളില്‍ നടത്തിയ യുദ്ധവിരുദ്ധ സന്ദേശപരിപാടിയില്‍ ജപ്പാന്‍ വനിതയുടെ സാന്നിധ്യം ശ്രദ്ധേയമായി. ടോക്കിയോ യൂനിവേഴ്‌സിറ്റിയിലെ ഫോറിന്‍ സ്റ്റഡീസ് ബിരുധധാരിയായ കാനാമറ്റ്‌സൂയി എന്ന ജപ്പാന്‍ വനിതയാണ് യുദ്ധവിരുദ്ധ സന്ദേശം നല്‍കാനെത്തിയത്.
ഹിരോഷിമ ദുരന്തത്തെക്കുറിച്ചും, കഠിനാധ്വാനത്തിലൂടെ ജപ്പാന്‍ കൈവരിച്ച മുന്നേറ്റത്തെക്കുറിച്ചും അവര്‍ വിശദീകരിച്ചു. വിദ്യാര്‍ഥികളുമായി നടത്തിയ അഭിമുഖത്തില്‍ ഒട്ടനവധി ജീവിതാനുഭവങ്ങള്‍ പങ്കുവെച്ച കാനാമറ്റ്‌സൂയി ഒറിഗാമി പേപ്പര്‍ ഉപയോഗിച്ച് സമാധാനത്തിന്റെ പ്രതീകമായ സഡാക്കോ കൊക്കിനെ നിര്‍മിക്കുകയും കുട്ടികളെ പഠിപ്പിക്കുകയും ചെയ്തു. ചടങ്ങില്‍ പ്രധാനധ്യാപിക കെ.പി കമല അധ്യക്ഷത വഹിച്ചു. ബ്ലോക്ക് പഞ്ചായത്തംഗം വി.പി കുഞ്ഞബ്ദുല്ല മാസ്റ്റര്‍, പ്രിന്‍സിപ്പല്‍ അബൂബക്കര്‍ ഒ.പി അശ്‌റഫ്, കെ.പി സുരേഷ്, കെ ജയരാജന്‍, സാമിയ മൊയ്തു സംസാരിച്ചു.