റിയോ ഡി ജനീറോ: ക്വാര്‍ട്ടറിലെത്തി വന്‍ പ്രതീക്ഷകള്‍ നല്‍കിയ ഇന്ത്യയുടെ വനിതാ അമ്പെയ്ത്ത് ടീം പുറത്തായി. റിക്കര്‍വ് ടീം ഇനത്തിന്റെ ക്വാര്‍ട്ടറില്‍ റഷ്യയോട് തോറ്റാണ് ഇന്ത്യയുടെ ദീപിക കുമാരി, ബൊംബെയ്‌ല ദേവി, ലക്ഷ്മിറാണി മാജി ടീം പുറത്തായത്. ഇരു ടീമും നാലു സെറ്റ് വീതം സ്വന്തമാക്കിയതിനെത്തുടര്‍ന്ന് ഷൂട്ടൗട്ടിലാണ് ഇന്ത്യന്‍ സംഘം തോല്‍വി വഴങ്ങിയത്. 23-25നാണ് ഇന്ത്യയുടെ തോല്‍വി.

 തുടക്കം മുതല്‍ ഇഞ്ചോടിഞ്ച് പോരാടാന്‍ ഇന്ത്യന്‍ ടീമിനു സാധിച്ചു. ആദ്യ സെറ്റ് റഷ്യ 48-55നു സ്വന്തമാക്കിയപ്പോള്‍ രണ്ടാം സെറ്റ് 53-52നു നേടി ഇന്ത്യ സമനില പിടിച്ചു. മൂന്നാം സെറ്റിലും ഇന്ത്യന്‍ താരങ്ങള്‍ മികവ് ആവര്‍ത്തിച്ചു. ഇതോടെ ഇന്ത്യ 53-50നു സെറ്റും ലീഡും വരുതിയിലാക്കി. എന്നാല്‍ നിര്‍ണായകമായ നാലാം സെറ്റ് 53-55 നേടി റഷ്യന്‍ താരങ്ങള്‍ തിരിച്ചടിച്ചു. ഇതോടെ വിജയികളെ നിര്‍ണയിക്കാന്‍ ഷൂട്ടൗട്ട് വേണ്ടി വന്നു. ഷൂട്ടൗട്ടില്‍ ആദ്യം റഷ്യ പത്തു ഷോട്ടുകളും നേടിയപ്പോള്‍ ഇന്ത്യക്കായി ബൊംബെയ്‌ല ഏഴെണ്ണം ലക്ഷ്യത്തിലെത്തിച്ചു.

രണ്ടാം ഷോട്ടില്‍ റഷ്യ ആറു നേടി പിന്നിലായപ്പോള്‍ ഇന്ത്യക്കായി ലക്ഷ്മിറാണി എട്ടെണ്ണം ലക്ഷ്യത്തിലെത്തിച്ച് മികവു കാട്ടി. 15-16 എന്ന നിലയില്‍ റഷ്യ മുന്നില്‍. അവസാന ഷൂട്ടൗട്ടില്‍ റഷ്യ ഒന്‍പതെണ്ണം ലക്ഷ്യത്തിലെത്തിച്ചപ്പോള്‍ ഇന്ത്യയുടെ ദീപിക കുമാരിക്ക് എട്ടെണ്ണമാണ് വിജയകരമായി പൂര്‍ത്തിയാക്കാന്‍ സാധിച്ചത്. 23-25നു റഷ്യ വിജയവും സെമി ബര്‍ത്തും ഉറപ്പാക്കി.