ചാവക്കാട്: തിരുവത്രയില്‍ കോണ്‍ഗ്രസ് ഐ ഗ്രൂപ്പ് പ്രവര്‍ത്തകര്‍ക്കുനേരെയുണ്ടായ എ വിഭാഗത്തിന്റെ ആക്രമണത്തില്‍ കെ.എസ്.യു തൃശൂര്‍ ജില്ലാ സെക്രട്ടറി എ.എസ് സറൂഖിനെ പൊലിസ് അറസ്റ്റ് ചെയ്തു. കോണ്‍ഗ്രസ് എ ഗ്രൂപ്പ് പ്രവര്‍ത്തകന്‍ കൂടിയാണ് കേസില്‍ രണ്ടാം പ്രതിയായ സറൂഖ്. കോടതിയില്‍ ഹാജരാക്കിയ സറൂഖിനെ റിമാന്‍ഡ് ചെയ്തു.
ഞായറാഴ്ച രാത്രി 10.30ന് പരപ്പില്‍താഴത്താണ് കേസിനാസ്പദമായ സംഭവം. ഇവിടെ സംസാരിച്ചുനില്‍ക്കുകയായിരുന്ന യൂത്ത് കോണ്‍ഗ്രസ് ചാവക്കാട് മണ്ഡലം സെക്രട്ടറി മണത്തല പരപ്പില്‍താഴം അറക്കല്‍ രതീശന്റെ മകന്‍ മിഥുന്‍(22), യൂത്ത് കോണ്‍ഗ്രസ് പ്രവര്‍ത്തകനായ ബേബി റോഡ് കൊട്ടിലിങ്ങല്‍ സിറാജുദ്ദീന്റെ മകന്‍ ഷാക്കിര്‍(20) എന്നിവരെ ഇരുമ്പുപൈപ്പുകളും വടിവാളുമായി എത്തിയ ഏഴംഗ സംഘം ആക്രമിക്കുകയായിരുന്നു. അക്രമികള്‍ ഇരുവരുടെയും ബൈക്കുകള്‍ തല്ലിത്തകര്‍ത്ത് സമീപത്തെ പാടത്തേക്കു തള്ളിയിടുകയും ചെയ്തു. രണ്ടുപേരെയും ചാവക്കാട് താലൂക്ക് ആശുപത്രിയില്‍ പ്രവേശിപ്പിച്ചിട്ടുണ്ട്.
ആക്രമിക്കപ്പെട്ടവര്‍ നല്‍കിയ മൊഴിയുടെ അടിസ്ഥാനത്തില്‍ സറൂഖിനു പുറമെ ബേബി റോഡ് സ്വദേശികളായ റഫീദ്, ഫൈസല്‍, അസ്‌ലം എന്നിവര്‍ക്കും കണ്ടാലറിയാവുന്ന മറ്റു മൂന്നുപേര്‍ക്കുമെതിരേ കേസെടുത്തിരുന്നു. തിരുവത്രയില്‍ കൊല്ലപ്പെട്ട കോണ്‍ഗ്രസ് എ വിഭാഗം പ്രവര്‍ത്തകന്‍ എ.സി ഹനീഫയുടെ സഹോദരന്‍ സെയ്തുമുഹമ്മദിന്റെ മകനാണ് അറസ്റ്റിലായ സറൂഖ്.
അതേസമയം, സംഭവവുമായി ബന്ധമില്ലാത്ത സറൂഖിനെ കേസില്‍പെടുത്താന്‍ ഐ ഗ്രൂപ്പിലെ ഒരു വിഭാഗം ആസൂത്രിതശ്രമം നടത്തുകയാണെന്ന് എ ഗ്രൂപ്പ് നേതാക്കള്‍ പ്രതികരിച്ചു.