വിഴിഞ്ഞം: മുഹിയിദ്ദീന്‍ പള്ളി ഉറൂസിന് (ചന്ദനക്കുടം) എട്ടിന് കൊടിയേറും. വൈകിട്ട് നാലിന് മുഹിയ്യിദ്ദീന്‍ പള്ളിയില്‍ നിന്ന് ആരംഭിക്കുന്ന ഘോഷയാത്ര ഹാര്‍ബര്‍, ടൗന്‍ഷിപ്പ്, ആഴാകുളം, തിയറ്റര്‍ ജങ്ഷന്‍, വിഴിഞ്ഞം ജങ്ഷന്‍ വഴി പള്ളിയങ്കണത്തില്‍ എത്തിച്ചേരുന്നതോടെ ജമാഅത്ത് പ്രസിഡന്റ് എന്‍. നൂഹക്കണ്ണ് കെടിയേറ്റ് കര്‍മം നിര്‍വഹിക്കും.
ഏഴ് മണിക്ക് നടക്കുന്ന സമൂഹ പ്രാര്‍ഥനക്ക് അസ്സയിദ് മഹമൂദ് സഫ്വാന്‍ തങ്ങള്‍ അല്‍ബുഖാരി അല്‍ ജലാലി നേതൃത്വം നല്‍കും. തുടര്‍ന്ന് എട്ടിന് റാത്തീബ്, 8.30 ന് ദഫമുട്ട് ,9.30 മുതല്‍ സിറാജുല്‍ ഇസ്‌ലാം മദ്‌റസ വിദ്യാര്‍ഥികള്‍ അവതരിപ്പിക്കുന്ന ബുര്‍ദ ആന്‍ഡ് ഇശല്‍ വിരുന്ന്. ഒന്‍പതാം തീയതി മുതല്‍ 17 വരെ എല്ലാ ദിവസവും മൌലിദും മതപ്രഭാഷണ പരമ്പരയും നടക്കും.ഒന്‍പതാം തീയതി സെയ്യിദ് ഹസ്ബുള്ള ബാഫഖി തങ്ങളും 10 ന് മൌലവി മുഹമ്മദ് റിയാസ് അലി ഹുദവിയും 11 ന് മൌലവി അബു റബീഅ് സദറത്തുള്ള ബാഖവിയും 12 ന് മൌലവി സ്വാലിഹ് ഹുദവിയും 13 ന് മൌലവി അബൂബക്കര്‍ ഹുദവിയും 14 ന് അല്‍ഹാഫിള് നിസാമുദ്ദീന്‍ അസ്ഹരി അല്‍ഖാസിമിയും 15 ന് യുവ പണ്ഡിതനും 16 കാരനുമായ അല്‍ഹാഫിള് സഫ്വാന്‍ അഹമ്മദും16 ന് മൌലവി അബ്ദുല്‍ വഹാബ് നഈമ്യും 17 ന് രാത്രി ഒന്‍പതിന് മൌലവി നൌഫല്‍ സഖാഫിയും പ്രഭാഷണം നടത്തും.12 ന് ബുര്‍ദ ഖവാലി, മുഹിയ്യിദ്ദീന്‍ മാല നഅത്ത് ശരീഫ്. 19 ന് പുലര്‍ച്ചെ മൂന്നിന് പട്ടണ പ്രദക്ഷിണം. തുടര്‍ന്ന് ജമാഅത്ത് ചീഫ് ഇമാം മൌലവി മുഹമ്മദ് റിയാസ് അലി ഹുദവിയുടെ നേതൃത്വത്തില്‍ മൌലിദ് പാരായണത്തിനും പ്രത്യേക പ്രാര്‍ഥനക്കും ശേഷം അന്നദാനത്തോട് കൂടി ഉറൂസ് സമാപിക്കും.കെ.എസ്.ആര്‍.ടി.സി ഡിപ്പോകളില്‍ നിന്ന് മുഹിയ്യിദ്ദീന്‍ പള്ളിയിലേക്ക് പ്രത്യേക ബസ് സര്‍വിസ് ഉണ്ടായിരിക്കും.