തൃശ്ശൂര്‍: നടി മഞ്ജു വാര്യര്‍ നല്‍കിയ പരാതിയില്‍ സംവിധായകന്‍ ശ്രീകുമാര്‍ മേനോനെ ക്രൈം ബ്രാഞ്ച് അറസ്റ്റ് ചെയ്തു. തൃശൂര്‍ പൊലിസ് ക്ലബില്‍ വിളിച്ചു വരുത്തി ക്രൈം ബ്രാഞ്ച് എ.സി.പി സി.പി ശ്രീനിവാസിന്റെ നേതൃത്തിലുള്ള സംഘം ചോദ്യംചെയ്താണ് അറസ്റ്റ് രേഖപ്പെടുത്തിയത്. പിന്നാലെ രണ്ടുപേരുടെ ജാമ്യത്തില്‍ വിടുകയും ചെയ്തു. നന്മ ഉദ്ദേശിച്ചു ചെയ്ത കാര്യങ്ങള്‍ തെറ്റിദ്ധരിക്കപ്പെട്ടുവെന്ന് ശ്രീകുമാര്‍ മേനോന്‍ പ്രതികരിച്ചു.

തന്നെ അപായപ്പെടുത്താനും അപകീര്‍ത്തിപ്പെടുത്താനും ശ്രമിക്കുന്നുവെന്ന മഞ്ജു വാര്യരുടെ പരാതിയില്‍ പൊലിസ് കേസെടുത്തിരുന്നു. ഒടിയന്‍ സിനിമ ചിത്രീകരണ വേളയില്‍ ഉണ്ടായ സംഭവങ്ങളാണ് പരാതിക്ക് ആധാരം.

പരാതിയുടെ അടിസ്ഥാനത്തില്‍ ആന്റണി പെരുമ്പാവൂര്‍ അടക്കമുള്ള സാക്ഷികളുടെ മൊഴിയെടുക്കുകയും ശ്രീകുമാര്‍ മേനോന്റെ വീട്ടിലും വസതിയിലും റെയ്ഡ് നടത്തുകയും ചെയ്തിരുന്നു. വൈകിട്ട് നാലുമണിക്ക് ആരംഭിച്ച ചോദ്യംചെയ്യല്‍ രാത്രി എട്ടര വരെ നീണ്ടുനിന്നു.