കോട്ടയം: വീട്ടില്‍ വെള്ളം ചോദിച്ചെത്തിയ യുവാവ് എട്ടാം ക്ലാസ് വിദ്യാര്‍ഥിനിയെ പീഡിപ്പിച്ചു. കോട്ടയം കാഞ്ഞിരപ്പള്ളിയിലാണ് സംഭവം. ഇന്നലെ വൈകീട്ടോടെ സ്‌കൂള്‍വിട്ട് വീട്ടിലെത്തിയതായിരുന്നു വിദ്യാര്‍ഥിനി. ഈ സമയത്ത് കുട്ടിയുടെ വീട്ടിലെത്തിയ പ്രതി കുടിക്കാന്‍ വെള്ളം ആവശ്യപ്പെടുകയായിരുന്നു.

വീട്ടില്‍ മറ്റാരും ഇല്ലെന്ന് മനസ്സിലാക്കിയ പ്രതി അതിക്രമിച്ച് കയറി പീഡിപ്പിക്കുകയായിരുന്നു. തുടര്‍ന്ന് ഇയാള്‍ ഇവിടെ നിന്നും രക്ഷപ്പെടുകയായിരുന്നു. ഉടന്‍തന്നെ പെണ്‍കുട്ടി വീട്ടുകാരെ ഫോണില്‍ വിളിച്ച് വിവരം പറഞ്ഞു. തുടര്‍ന്ന് വീട്ടുകാരെത്തിയാണ് പൊലിസില്‍ പരാതി നല്‍കിയത്. വിദ്യാര്‍ഥിനിയുടെ വാക്കുകളില്‍ നിന്നും പ്രതി ആ നാട്ടുകാരനല്ലെന്നാണ് മനസ്സിലാക്കുന്നതെന്ന് പൊലിസ് പറഞ്ഞു.

പെണ്‍കുട്ടി നല്‍കിയ വിവരങ്ങളുടെ അടിസ്ഥാനത്തില്‍ പൊലിസ് ഒരു രേഖാചിത്രം തയാറാക്കിയിട്ടുണ്ട്. ബലാത്സംഗം, കുട്ടികള്‍ക്കെതിരായ ലൈംഗിക അതിക്രമം(പോക്‌സോ) തുടങ്ങിയ വകുപ്പുകള്‍ ചേര്‍ത്താണ് പൊലിസ് കേസെടുത്തിരിക്കുന്നത്.