മുവാറ്റുപുഴ: തടി പിടിക്കാന്‍ കൊണ്ടുവന്ന ആന ഇടഞ്ഞത് പരിഭ്രാന്തിപരിത്തി. മുവാറ്റുപുഴ നിര്‍മലാ കോളജിനടുത്തുള്ള അസീസി ഭവനിലെ പുരയിടത്തില്‍ തടിപിടിക്കാന്‍ കൊണ്ട് വന്ന കൊമ്പനാണ് ഇടഞ്ഞത്. ഇന്നലെ രാവിലെ ഒന്‍പത് മണിയോടെ പുരയിടത്തില്‍ തടിപിടിക്കുന്നതിനിടെ ആന പുറത്തിരുന്ന പാപ്പാനെ കുലുക്കി താഴെ വീഴിച്ച ശേഷം തുമ്പികൈ കൊണ്ട് തട്ടി തെറിപ്പിച്ചു. പിന്നിട് കൊമ്പ് കൊണ്ട് കുത്താന്‍ ശ്രമിക്കുന്നതിനിടെ പാപ്പാന്‍ ഓടി രക്ഷപ്പെടുകയായിരുന്നു പരുക്കേറ്റ പാപ്പാന്‍ ചാലക്കുടി വട്ടപ്പാറ സുജേഷ് (39) നെ മുവാറ്റുപുഴ നിര്‍മ്മലാ ആശുപത്രിയില്‍ പ്രവേശിപ്പിച്ചു. പാപ്പാന്റെ വാരിയെല്ലിനും തലക്കും പരിക്കുണ്ട്.
നാട്ടുകാര്‍ വിവരം അറിയിച്ചതിനെ തുടര്‍ന്ന് പൊലിസ്, ഫയര്‍ഫോഴ്‌സ്, ഫോറസ്റ്റ് അധികൃതര്‍ സ്ഥലത്തെത്തി. മണിക്കൂറുകള്‍ക്ക് ശേഷം ഡോ.എബ്രാഹാം തരകന്‍ ആനയെ മയക്ക് വെടിവച്ച് തളച്ചതോടെയാണ് മണിക്കൂറുകളോളം നാടിനെ മുള്‍മുനയില്‍ നിറുത്തിയ രംഗത്തിന് സമാപനമായത്.