ന്യൂഡല്‍ഹി: പ്രധാനമന്ത്രി നരേന്ദ്രമോദി രണ്ടു വര്‍ഷമായി കുംഭകര്‍ണനെ പോലെ ഉറങ്ങുകയായിരുന്നുവെന്ന് ബി.എസ്.പി അധ്യക്ഷ മായാവതി. ദലിത് വിഭാഗങ്ങള്‍ക്കെതിരെ നടക്കുന്ന അതിക്രമങ്ങളക്കുറിച്ച് വളരെ വൈകി നടത്തിയ പ്രസ്താവനയോട് പ്രതികരിക്കുകയായിരുന്നു മായാവതി.

'ദലിത് വിഭാഗത്തോട് കാണിക്കുന്ന അതിക്രമങ്ങളോട് പ്രതികരിക്കാന്‍ അദ്ദേഹം ഇതുവരെ തയ്യാറായിരുന്നില്ല. അദ്ദേഹം രണ്ടു വര്‍ഷമായി മൗനത്തിലായിരുന്നു. കുംഭകര്‍ണനെ പോലെ ഉറങ്ങുകയായിരുന്നു. ഇപ്പോള്‍ അദ്ദേഹം എഴുന്നേറ്റിരിക്കുന്നു. കാരണം ഉത്തര്‍പ്രദേശ് ഉള്‍പ്പെടെ ചില സംസ്ഥാനങ്ങളില്‍ തെരഞ്ഞെടുപ്പ് അടുത്തിരിക്കുകയാണ്. അദ്ദേഹത്തിനറിയാം ഒരു ദലിത് വോട്ടു പോലും അദ്ദേഹത്തിന് ലഭിക്കുകയില്ല. ദലിതരുടെ വോട്ട് ലഭിക്കാന്‍ വേണ്ടി മാത്രമാണ് അദ്ദേഹം ഇത്തരമൊരു പ്രസ്താവന നടത്തിയത്. മായാവതി പറഞ്ഞു.

ഗോ സംരക്ഷണത്തിന്റെ പേരില്‍ അക്രമം നടക്കുന്നവര്‍ക്കെതിരെ കഴിഞ്ഞ ദിവസം മോദി പ്രതികരിച്ചിരുന്നു. ഇതിനെതിരെയാണ് മായാവതി രംഗത്തുവന്നിരിക്കുന്നത്.