കൊച്ചി: അഴീക്കോട് എം.എല്‍.എ കെ.എം ഷാജിയെ ഹൈക്കോടതി അയോഗ്യനാക്കാന്‍ ഇടയായ വര്‍ഗീയ പരാമര്‍ശങ്ങളടങ്ങിയ ലഘുലേഖകള്‍ പൊലിസ് കണ്ടെടുത്തതല്ലെന്ന് ആരോപണം. ഇതുസംബന്ധിച്ച് കെ.എം ഷാജി ഹൈക്കോടതിയില്‍ ഹരജി നല്‍കി. കേസ് ചൊവ്വാഴ്ച്ച പരിഗണിക്കും.

വര്‍ഗീയ പരാമര്‍ശമുള്ള ലഘുലേഖ പരാതിക്കാരനായ സി.പി.എം നേതാവ് പൊലിസ് സ്റ്റേഷനില്‍ എത്തിച്ചതാണെന്നാണ് ഹരജിയില്‍ പറയുന്നത്. അതേസമയം യു.ഡി.എഫ് പ്രാദേശിക നേതാവ് എന്‍.ടി. മനോരമയുടെ വീട്ടില്‍നിന്നു വര്‍ഗീയത പരത്തുന്ന രേഖ പിടിച്ചെടുത്തെന്നായിരുന്നു എസ്.ഐ നല്‍കിയ മൊഴി. ഇതിനെതുടര്‍ന്നാണ് വളപട്ടണം എസ്.ഐ ആയിരുന്ന ശ്രീജിത്ത് കോടേരിയ്‌ക്കെതിരെ ഷാജി കോടതിയെ സമീപിച്ചിരിക്കുന്നത്.

എസ്.ഐ കോടതിയില്‍ ഹാജരാക്കിയ മഹസറില്‍ ഇത്തരത്തില്‍ ഒരു ലഘുലേഖ മനോരമയുടെ വീട്ടില്‍ നിന്നും പിടിച്ചെടുത്തതായി രേഖപ്പെടുത്തിയിട്ടില്ലെന്ന് ഷാജി ഹരജിയില്‍ പറയുന്നു. ഇത് സംബന്ധിക്കുന്ന രേഖകള്‍ ഷാജി തെളിവായി കോടതിയില്‍ നല്‍കിയിട്ടുണ്ട്.