തളിപ്പറമ്പ്: അധികൃതരുടെ നിരുത്തരവാദപരമായ മറുപടി തളിപ്പറമ്പ് താലൂക്ക് വികസനസമിതി യോഗത്തില്‍ ബഹളത്തിനിടയാക്കി. പരപ്പ ക്വാറി പ്രശ്‌നത്തിന് പരിഹാരം കാണാന്‍ സമയമില്ലെന്ന് പറയുന്ന താലൂക്ക് സര്‍വേയര്‍ക്ക് പുതിയ ക്വാറി ആരംഭിക്കുന്നതിന് സ്ഥലം അളന്ന് തിരിക്കാന്‍ സമയമെങ്ങിനെയുണ്ടായെന്ന് പരാതിക്കാര്‍ ചോദിച്ചു. കഴിഞ്ഞ വികസന സമിതി തീരുമാനപ്രകാരം തഹസില്‍ദാറുടെ നേതൃത്വത്തില്‍ റവന്യൂ അധികൃതരും പരാതിക്കാരന്‍ ഒ.കെ സിറാജുദ്ദീനും ഉള്‍പ്പെടെയുള്ളവരുടെ സംഘം ഓഗസ്റ്റ് ഒന്നിന് സ്ഥലം സന്ദര്‍ശിച്ച് തെളിവെടുപ്പ് നടത്തിയിരുന്നെങ്കിലും മിച്ചഭൂമി അളക്കാന്‍ താലൂക്ക് സര്‍വേയര്‍ ഇല്ലെന്ന വാദം ഉന്നയിച്ച് തടിയൂരാന്‍ ശ്രമിച്ചത് പരാതിക്കാരില്‍ നിന്ന് കടുത്ത പ്രതിഷേധമുയരാന്‍ കാരണമായി.
ഉദയഗിരി പഞ്ചായത്ത് അതിര്‍ത്തിയായ ചാത്തമംഗലത്ത് പുതിയ ക്വാറി ആരംഭിക്കുന്നതിന് സ്ഥലം അളന്നുതിരിച്ച് കുറ്റിയടിക്കാന്‍ താലൂക്ക് സര്‍വേയര്‍ എത്തിയത് ചൂണ്ടിക്കാട്ടി പരാതിക്കാര്‍ വികസന സമിതി മുമ്പാകെ ചോദ്യമുന്നയിച്ചെങ്കിലും അധികൃതര്‍ക്ക് മറുപടിയുണ്ടായിരുന്നില്ല. ഏറെ നേരത്തെ വാഗ്വാദങ്ങള്‍ക്ക് ശേഷം പരമാവധി വേഗത്തില്‍ സ്ഥലം അളന്ന് മിച്ചഭൂമി കണ്ടെത്തുമെന്ന് ഉറപ്പ് നല്‍കിയ ശേഷമാണ് ബഹളം അവസാനിച്ചത്.
ആലക്കോട് കാക്കടവ് സെറ്റില്‍മെന്റ് കോളനിയില താസക്കാരിയായ അമ്മിണിയെ ആലക്കോട് പഞ്ചായത്ത് പ്രസിഡന്റ് ജാതി പറഞ്ഞ് ആക്ഷേപിച്ചെന്ന വിഷയത്തില്‍ പൊലിസിന് പരാതി നല്‍കാന്‍ വികസനസമിതി യോഗം നിര്‍ദ്ദേശിച്ചു.
പരിയാരം മെഡിക്കല്‍ കോളജിന് മുന്നില്‍ ദേശീയപാതയോരത്ത് അനധികൃതമായി സ്ഥാപിച്ച ബസ് കാത്തിരിപ്പുകേന്ദ്രവും രാഷ്ട്രീയപാര്‍ട്ടികളുടെ മൂന്ന് കൊടിമരങ്ങളും നീക്കം ചെയ്യണമെന്ന് ആവശ്യപ്പെട്ട് നല്‍കിയ പരാതിയില്‍ കൊടിമരങ്ങള്‍ മാറ്റുന്നതിന് പരിയാരം പൊലിസില്‍ പരാതി നല്‍കിയതായി ദേശീയപാതാ വിഭാഗം അറിയിച്ചു. തളിപ്പറമ്പ് പൊലിസ് സ്‌റ്റേഷനിലും ഡിവൈ.എസ്.പി ഓഫിസിലും ഭിന്നശേഷിക്കാര്‍ക്ക് റാമ്പുകള്‍ നിര്‍മിക്കണമെന്ന പി.പി മോഹനന്റെ ആവശ്യത്തില്‍ പൊതുമരാമത്ത് ബില്‍ഡിങ്‌സ് വിഭാഗത്തിന് പരാതി കൈമാറാന്‍ യോഗം നിര്‍ദേശിച്ചു.
അപകടാവസ്ഥയിലുള്ള തളിപ്പറമ്പ് താലൂക്ക് ആശുപത്രിയിലെ സ്ത്രീകളുടേയും കുട്ടികളുടേയും വാര്‍ഡ് പുതുക്കിപ്പണിയാന്‍ 35 ലക്ഷം രൂപ അനുവദിച്ചതായി പൊതുമരാമത്ത് അധികൃതര്‍ അറിയിച്ചു. ആശുപത്രിയില്‍ നിരീക്ഷണ കാമറ ഉള്‍പ്പെടെ സ്ഥാപിക്കാനും തീരുമാനമായി. പത്തു സൗജന്യ ഡയാലിസിസ് മെഷിനുകള്‍ ഒരുക്കുന്ന ജോലിയും പുരോഗതിയിലാണ്. ഇതിനായി പ്രത്യേക ട്രാന്‍സ്‌ഫോര്‍മറും ആശുപത്രി വളപ്പില്‍ സ്ഥാപിക്കും. ടാഗോര്‍ വിദ്യാനികേതന് സമീപം പ്രത്യേക ബസ്‌ബേയും പുതിയ ബസ് വെയിറ്റിങ് ഷെല്‍ട്ടറും നിര്‍മിക്കാന്‍ ധാരണയായതായി ബന്ധപ്പെട്ടവര്‍ അറിയിച്ചു.
താലൂക്ക് ഓഫിസിലെയും മിനി സിവില്‍ സ്റ്റേഷനിലെയും ജൈവമാലിന്യങ്ങള്‍ സംസ്‌കരിക്കുന്നതിന് രണ്ട് തുമ്പൂര്‍മൂഴി മോഡല്‍ ജൈവസംസ്‌കരണ യൂണിറ്റുകള്‍ താലൂക്ക് ഓഫിസ് വളപ്പില്‍ സ്ഥാപിക്കാനും തീരുമാനമായി. തൃച്ചംബരം ദേശീയപാതയിലെ അപകടാവസ്ഥയിലുള്ള ബസ് വെയിറ്റിങ് ഷെല്‍ട്ടര്‍ പൊളിച്ചുനീക്കാന്‍ കരാറെടുത്തവര്‍ പിന്‍വാങ്ങിയതിനാല്‍ പുതിയ ടെണ്ടര്‍ വിളിച്ചിരിക്കയാണെന്ന് ദേശീയപാത അധികൃതര്‍ വെളിപ്പെടുത്തി.
സഹകരണ ആശുപത്രിക്കും താലൂക്ക് ആശുപത്രിക്കും ഇടയിലുള്ള അനധികൃത കൈയേറ്റങ്ങള്‍ ഒഴിപ്പിക്കാന്‍ അടുത്തദിവസം തന്നെ നടപടികള്‍ ഉര്‍ജിതമാക്കും. നഗരസഭാ ചെയര്‍മാന്‍ അള്ളാംകുളം മഹമ്മൂദ് അധ്യക്ഷനായി. തഹസില്‍ദാര്‍ കെ. സുജാത, ഡെപ്യൂട്ടി തഹസില്‍ദാര്‍മാരായ എം. മാനസന്‍, കെ.ആര്‍ ചന്ദ്രശേഖരന്‍, പി.വി നാരായണന്‍ നമ്പ്യാര്‍, ശ്രീകണ്ഠപുരം നഗരസഭാ വൈസ് ചെയര്‍മാന്‍ നിഷിത റഹ്മാന്‍ പങ്കെടുത്തു.