മലപ്പുറം: ഇന്ത്യയിലെ നൂറുകോടിയിലേറെ വരുന്ന ഹിന്ദുക്കളുടെ വക്താവാകാന്‍ ആര്‍.എസ്.എസ് മേധാവി മോഹന്‍ ഭാഗവത് ശ്രമിക്കേണ്ടെന്ന് സി.പി.ഐ ദശീയ ജനറല്‍ സെക്രട്ടറി ഡി.രാജ പറഞ്ഞു.
മോഹന്‍ ഭാഗവത് ആര്‍.എസ്.എസ് മേധാവി മാത്രമാണെന്നും ഹിന്ദുക്കളെ പ്രതിനിധീകരിക്കാനും അവര്‍ക്ക് വേണ്ടി സംസാരിക്കാനും അദ്ദേഹത്തെ ആരും ചുമതലപ്പെടുത്തിയിട്ടില്ലെന്നും രാജ പറഞ്ഞു.
ബി.ജെ.പിയുടെ പതനം തുടങ്ങിയെന്നും ആര്‍.എസ്.എസും ബി.ജെ.പിയും ഇന്ത്യയെയും ഇന്ത്യന്‍ ഭരണഘടനയെയും അവഹേളിക്കുകയും അവമതിക്കുകയുമാണെന്നും അദ്ദേഹം പറഞ്ഞു.
പൗരത്വത്തിന്റെ പേരുപറഞ്ഞ് രാജ്യത്ത് തടങ്കല്‍ പാളയങ്ങള്‍ നിര്‍മിക്കാന്‍ അനുവദിക്കാനാവില്ല. മതത്തിന്റെ പേരില്‍ പൗരത്വം തീരുമാനിക്കുന്നത് തെറ്റായ രീതിയാണെന്നും രാജ പറഞ്ഞു. പൗരത്വ പ്രശ്‌നത്തില്‍ ജനങ്ങള്‍ക്കിടയില്‍ വ്യാജ പ്രചാരണം നടത്തുന്നതിന് പിന്നില്‍ ബി.ജെ.പിയുടെ സോഷ്യല്‍ മീഡിയ വിഭാഗമാണ്. ഡല്‍ഹിയില്‍ ബി.ജെ.പിയുടെ സോഷ്യല്‍ മീഡിയ വിഭാഗം പ്രത്യേക യോഗം ചേര്‍ന്നിരുന്നെന്നും ആഭ്യന്തരമന്ത്രി അമിത് ഷാ ഈ യോഗത്തില്‍ പങ്കെടുത്തിരുന്നെന്നും പറഞ്ഞ ഡി.രാജ, വ്യാജപ്രചാരണങ്ങള്‍ അഴിച്ചുവിടുന്ന ബി.ജെ.പി അതിന്റെ ഉത്തരവാദിത്വം മറ്റു സംഘടനകളില്‍ ആരോപിക്കുകയാണെന്നും കുറ്റപ്പെടുത്തി.
രാജ്യത്ത് ആഭ്യന്തരയുദ്ധ സമാനമായ സാഹചര്യമാണുള്ളത്. എതിര്‍ക്കുന്നവരെ ഭയപ്പെടുത്തി നിശബ്ദരാക്കുകയാണ്. സാമൂഹികമായും സാമ്പത്തികമായും രാജ്യം തകര്‍ന്നുകിടക്കുകയാണ്. ഈ സന്ദര്‍ഭത്തിലും വര്‍ഗീയത പറയാനായി മാത്രമാണ് സര്‍ക്കാര്‍ വായ തുറക്കുന്നത്. നിലംപരിശായ രാജ്യത്തിന്റെ സാമ്പത്തിക സ്ഥിതിയെ കുറിച്ച് പ്രധാനമന്ത്രി മിണ്ടുന്നില്ല. തൊഴിലാളികളും കര്‍ഷകരും വേദനയുടെ ആഴങ്ങളിലാണ്.
പൗരത്വ നിയമത്തിനെതിരെ ദേശീയ തലത്തില്‍ കോണ്‍ഗ്രസും ഇടതുപക്ഷവും ഒന്നിച്ചാണ് നീങ്ങുന്നതെന്നും കേരളത്തില്‍ ഒരേ വേദിയില്‍ പ്രതിഷേധിച്ചതില്‍ തെറ്റില്ലെന്നും അദ്ദേഹം പറഞ്ഞു. വാര്‍ത്താ സമ്മേളനത്തില്‍ വി.ചാമുണി, പി.കെ കൃഷ്ണ ദാസ് പങ്കെടുത്തു.