പാലക്കാട്: പൊള്ളാച്ചിയിലെ കന്നുകാലി ചന്തയില്‍നിന്നു കുഴല്‍മന്ദം ചന്തയിലേക്ക് ലോറിയില്‍ കൊണ്ട് വരുന്നതിനിടെ ചത്ത പോത്തിനെ റോഡരികില്‍ ഉപേക്ഷിച്ചു കച്ചവടക്കാര്‍ മുങ്ങി. ചത്ത പോത്തിനെ പട്ടികളും കുറുക്കന്മാരും കടിച്ചുകീറി മാംസാവശിഷ്ടങ്ങള്‍ റോഡില്‍ കൊണ്ടിട്ടതിനാല്‍ യാത്രക്കാര്‍ക്കു ദുരിതമായിട്ടുണ്ട്. മന്നത്തുകാവ് തേങ്കുറിശ്ശി റോഡില്‍ തായങ്കാവ് ക്ഷേത്രത്തിനു സമീപം റോഡരികിലാണ് പോത്തിനെ ഉപേക്ഷിച്ചത്. അഞ്ചു് ദിവസം മുന്‍പാണ് ഇവിടെ കൊണ്ടുവന്ന് തള്ളിയത്.
അന്ന് രാത്രി തന്നെ പോത്തിന്റെ ശരീരാവശിഷ്ടങ്ങള്‍ പട്ടികള്‍ കടിച്ചു കീറി റോഡിലേക്ക് ഇടാന്‍ തുടങ്ങിയിരുന്നു. കഴുകനും മറ്റും കൊത്തിവലിച്ചു സമീപത്തെ ജലാശയങ്ങളില്‍അവശിഷ്ടം കൊണ്ടിട്ട് മലിനമാക്കന്നതും പ്രശ്‌നമാവുന്നുണ്ട്. രാത്രി സമയത്ത് പട്ടികള്‍ ഇവിടെ കൂട്ടം ചേര്‍ന്ന് മാംസം തിന്നാന്‍ എത്തുന്നത് ഇരു ചക്രവാഹന യാത്രികര്‍ക്ക് നേരെ പട്ടികള്‍ കുരച്ചുചാടുന്നത് അപകടമുണ്ടാക്കുന്നു. മഴ ചാറി തുടങ്ങിയാല്‍ റോഡിലൂടെ ദുര്‍ഗന്ധം മൂലം നടക്കാനും പറ്റാത്ത അവസ്ഥയുണ്ട്. കാലിവസന്ത രോഗം പിടിപെട്ടാണ് പോത്തു ചത്തതെന്ന സംശയമുണ്ട് .