ദുബൈ: മാറിക്കൊണ്ടിരിക്കുന്ന വിമാന ഷെഡ്യൂളുകൾക്കിടയിൽ യാത്രക്കാർക്ക് കൂടുതൽ സൗകര്യമൊരുക്കി എമിറേറ്റ്‌സ് എയർലൈൻ. സർവീസുകൾ തടസ്സപ്പെടുന്നത് മൂലമുള്ള ബുദ്ധിമുട്ടുകൾ കുറയ്ക്കുന്നതിനായി, യാത്രക്കാർക്ക് പുറപ്പെടുന്ന സമയത്തിന് 72 മണിക്കൂർ മുമ്പ് വരെ ഓൺലൈനായി ടിക്കറ്റുകൾ റീബുക്ക് ചെയ്യാൻ സാധിക്കും. വിമാനത്താവളങ്ങളിലെ തിരക്ക് ഒഴിവാക്കാനും യാത്രക്കാർക്ക് വീട്ടിലിരുന്ന് തന്നെ യാത്രാ പ്ലാനുകൾ മാറ്റാനും ലക്ഷ്യമിട്ടാണ് ഈ നടപടി.

ബുക്കിംഗുകൾ എങ്ങനെ നിയന്ത്രിക്കാം?

എമിറേറ്റ്‌സിന്റെ ഔദ്യോഗിക വെബ്‌സൈറ്റിലെ 'മാനേജ് യുവർ ബുക്കിംഗ്' (Manage Your Booking) എന്ന ലിങ്ക് വഴിയോ എമിറേറ്റ്‌സ് മൊബൈൽ ആപ്പ് വഴിയോ യാത്രക്കാർക്ക് പുതിയ തീയതികൾ തിരഞ്ഞെടുക്കാം.

പുറപ്പെടാൻ 72 മണിക്കൂറിൽ താഴെ മാത്രമുള്ള സാഹചര്യമാണെങ്കിൽ എമിറേറ്റ്‌സ് സപ്പോർട്ട് ടീമിനെ നേരിട്ടോ സോഷ്യൽ മീഡിയയിലെ ഡയറക്ട് മെസേജ് (DM) വഴിയോ ബന്ധപ്പെടണം.

യാത്രാ ഇളവ് അനുസരിച്ച് ഏപ്രിൽ 30 വരെയുള്ള ടിക്കറ്റുകളിൽ ഒമ്പത് തവണ വരെ മാറ്റങ്ങൾ വരുത്താൻ സാധിക്കും.

ALSO READ: യുഎഇ-ഇന്ത്യ വിമാന സർവീസുകൾ വെട്ടിക്കുറച്ച് എയർ ഇന്ത്യ എക്സ്പ്രസ്; യാത്രികർക്ക് മുന്നറിയിപ്പുമായി അധികൃതർ

കണക്റ്റിംഗ് യാത്രക്കാർ ശ്രദ്ധിക്കുക

ദുബൈ വഴി മറ്റ് രാജ്യങ്ങളിലേക്ക് പോകേണ്ട (Connecting Flights) യാത്രക്കാരുടെ ടിക്കറ്റുകൾ റദ്ദാക്കപ്പെട്ടിട്ടുണ്ടെങ്കിൽ, അവർ ഒരു കാരണവശാലും വിമാനത്താവളത്തിലേക്ക് പോകരുത്. പകരം എയർലൈനുമായി ബന്ധപ്പെട്ട് ടിക്കറ്റുകൾ പുനഃക്രമീകരിച്ച ശേഷം മാത്രമേ യാത്ര തിരിക്കാവൂ. നിലവിൽ വ്യോമാതിർത്തി ഭാഗികമായി തുറന്നതിനെത്തുടർന്ന് പരിമിതമായ സർവീസുകൾ മാത്രമാണ് എമിറേറ്റ്‌സ് നടത്തുന്നത്.

റീഫണ്ട് നടപടികൾ

• വിമാനം റദ്ദാക്കിയത് മൂലം യാത്ര വേണ്ടെന്നു വെക്കുന്നവർക്ക് ടിക്കറ്റ് തുക തിരികെ ലഭിക്കും.
• എയർലൈൻ വഴി നേരിട്ട് ടിക്കറ്റ് എടുത്തവർക്ക് വെബ്‌സൈറ്റിലെ റീഫണ്ട് ഫോം വഴി പണം ആവശ്യപ്പെടാം.
• ട്രാവൽ ഏജന്റുമാർ വഴി ടിക്കറ്റ് എടുത്തവർ റീഫണ്ടിനായി അതത് ഏജൻസികളെത്തുടന്നെ സമീപിക്കണം.

സുരക്ഷാ നിർദ്ദേശങ്ങൾ

ഓൺലൈൻ തട്ടിപ്പുകൾക്കെതിരെ യാത്രക്കാർ ജാഗ്രത പാലിക്കണമെന്ന് എമിറേറ്റ്‌സ് മുന്നറിയിപ്പ് നൽകി. സോഷ്യൽ മീഡിയയിലെ പൊതുവായ കമന്റുകളിൽ ബുക്കിംഗ് വിവരങ്ങളോ ഫോൺ നമ്പറോ പങ്കുവെക്കരുത്. വ്യക്തിഗത വിവരങ്ങൾ ചോദിക്കുന്ന വ്യാജ സന്ദേശങ്ങളിൽ വീഴരുതെന്നും ഔദ്യോഗിക പ്ലാറ്റ്‌ഫോമുകൾ മാത്രം ഉപയോഗിക്കണമെന്നും എയർലൈൻ ഓർമ്മിപ്പിച്ചു.

emirates airline allows passengers to rebook flight tickets online to reduce congestion at airports. the move aims to help travelers manage schedule changes easily and avoid long queues amid ongoing disruptions affecting several international flights.