പീരുമേട്: കെ.എസ്.ആര്‍.ടി.സി ബസും ജീപ്പും കൂട്ടിയിടിച്ച് ദേശിയ പാതയില്‍ ഗതാഗതം തടസപ്പെട്ടു. ദേശിയപാത 183 ല്‍ വളഞ്ഞാങ്ങാനം വെള്ളച്ചാട്ടത്തിന് സമീപം ഇന്നലെ ഉച്ചകഴിഞ്ഞ് മൂന്നരയോടെയാണ് അപകടം. കുട്ടിക്കാനത്തു നിന്നും കോട്ടയത്തേക്ക് പോവുകയായിരുന്ന കെ.എസ്.ആര്‍.ടി.സി ബസ് മറ്റൊരു വാഹനത്തെ മറികടക്കുന്നതിനിടെ എതിര്‍ദിശയില്‍ നിന്നും വന്ന ജീപ്പില്‍ ഇടിക്കുകയായിരുന്നു.  കമ്പംമെട്ട് സ്വദേശികള്‍ സഞ്ചരിച്ചിരുന്ന ജീപ്പാണ് അപകടത്തില്‍പ്പെട്ടത്. ഇടിയുടെ ആഘാതത്തില്‍ ജീപ്പ് റോഡില്‍ നിന്നും തെന്നിമാറി സമീപത്തെ സംരക്ഷണ ഭിത്തിയില്‍ ഇടിച്ചു നിന്നു. അപകടത്തെ തുടര്‍ന്ന് ദേശിയ പാതയില്‍ ഗതാഗതം  സ്തംഭിച്ചു. ഹൈവേ പൊലിസ്  സ്ഥലത്തെത്തി ഗതാഗതം പുനഃസ്ഥാപിച്ചു. യാത്രക്കാര്‍ നിസ്സാര പരുക്കുകളോടെ രക്ഷപ്പെട്ടു.