വടക്കാഞ്ചേരി : തലപ്പിള്ളി താലൂക്കില്‍ വ്യാപകമായി കൊണ്ടിരിയ്ക്കുന്ന കൃത്രിമ പാല്‍, വെളിച്ചെണ്ണ വില്‍പ്പനയ്‌ക്കെതിരെ ശക്തമായ നടപടി സ്വീകരിയ്ക്കാന്‍ തലപ്പിള്ളി താലൂക്ക് വികസന സമിതി യോഗം തീരുമാനമെടുത്തു. സ്‌കൂളുകള്‍ കേന്ദ്രീകരിച്ച് നടക്കുന്ന ലഹരി വസ്തുക്കളുടെ വില്‍പ്പനയ്‌ക്കെതിരെ നടപടി കൈകൊള്ളും. ഇതിന്റെ ഭാഗമായി സ്‌കൂളുകള്‍ കേന്ദ്രീകരിച്ച് ബോധവല്‍ക്കരണ ക്ലാസുകള്‍ സംഘടിപ്പിയ്ക്കാനും തീരുമാനമായി.
വടക്കാഞ്ചേരി നഗരത്തിലെ ഗതാഗത കുരുക്ക് പരിഹരിയ്ക്കും. പാതയോരങ്ങളില്‍ ജീര്‍ണ്ണാവസ്ഥയില്‍ നിലകൊള്ളുന്ന മരങ്ങളും ശിഖിരങ്ങളും മുറിച്ച് മാറ്റും.
നിലവില്‍ റീ സര്‍വ്വേ നടന്ന നെല്ലുവായ് വില്ലേജിലും തുടങ്ങാനിരിയ്ക്കുന്ന കോട്ടപ്പുറം, കിരാലൂര്‍ വില്ലേജിലും എല്ലാ സര്‍വ്വേ അതിര്‍ത്തികളിലും സര്‍വ്വേ കല്ലുകള്‍ സ്ഥാപിയ്ക്കുന്നതിനും തീരുമാനമെടുത്തു. നഗരസഭ ചെയര്‍പേഴ്‌സണ്‍ ശിവപ്രിയ സന്തോഷ് അധ്യക്ഷനായി.
ബ്ലോക്ക് പഞ്ചായത്ത് പ്രസിഡണ്ട് എസ്. ബസന്ത് ലാല്‍ , തഹസില്‍ദാര്‍ ടി. ബ്രീജാകുമാരി, ഹെഡ്ക്വാര്‍ട്ടേഴ്‌സ് ഡെപ്യൂട്ടി തഹസില്‍ദാര്‍ കെ.ജി രാജന്‍, രാഷ്ട്രീയ കക്ഷി പ്രതിനിധികള്‍, വകുപ്പ് മേധാവികള്‍ സംസാരിച്ചു.