ന്യൂഡല്‍ഹി: എപ്പോഴും തിരക്കില്‍ നിന്നൊഴിഞ്ഞു നിന്ന അഹമ്മദ് പട്ടേല്‍ ഒരു ദിവസം കൊണ്ട് രാജ്യം മുഴുവന്‍ അറിയപ്പെടുന്ന നേതാവായി മാറി. പട്ടേല്‍ ഭായിയെന്ന് കോണ്‍ഗ്രസുകാര്‍ സ്‌നേഹപൂര്‍വം വിളിക്കുന്ന അഹമ്മദ് പട്ടേല്‍, യു.പി.എ സര്‍ക്കാരുകളുടെ രൂപീകരണത്തില്‍ നിര്‍ണായക പങ്കുവഹിച്ചെങ്കിലും എല്ലാം അണിയറയില്‍ നിന്നുകൊണ്ടായിരുന്നു ഇതെല്ലാം ചെയ്തത്.
ഇന്ദിരാ ഗാന്ധിയുടെ കാലം മുതല്‍ കോണ്‍ഗ്രസിന്റെ വിശ്വസ്തനായ അദ്ദേഹത്തെ മന്‍മോഹന്‍ സിങിന്റെ മന്ത്രിസഭയില്‍ രണ്ടുവട്ടം മന്ത്രികസേരയിലേക്ക് ക്ഷണിച്ചെങ്കിലും അദ്ദേഹം തിരശീലക്കു പിന്നില്‍ നില്‍ക്കാനാണ് ഇഷ്ടപ്പെട്ടത്. എന്നാല്‍ രാജ്യസഭാ തെരഞ്ഞെടുപ്പോടെ അദ്ദേഹം മുന്‍നിരയിലേക്കാണ് എത്തപ്പെട്ടത്.