വടക്കാഞ്ചേരി: മോഷണകേസില്‍ ഒളിവിലായിരുന്ന പിടികിട്ടാപ്പുള്ളി ഏഴ് വര്‍ഷങ്ങള്‍ക്ക് ശേഷം പൊലിസ് പിടിയില്‍. കോഴിക്കോട് ആസ്ഥാനമായി പ്രവര്‍ത്തിക്കുന്ന യൂസ്ഡ് ഓയില്‍ കമ്പനിയുടെ ഡ്രൈവറായ പ്രതി 2011 ല്‍ വടക്കാഞ്ചേരിയില്‍ വച്ച് കമ്പനിയുടെ ആവശ്യത്തിനായി ലോറിയില്‍ വച്ചിരുന്ന 12,5,000 രൂപ മോഷണം നടത്തിയ ശേഷം ഒളിവില്‍ പോകുകയായിരുന്നു.
അട്ടപ്പാടി അഗളി സ്വദേശിയായ പൊന്‍പാറ സുബൈദ മകന്‍ മുനീര്‍ (29) നെയാണ് വടക്കാഞ്ചേരി പൊലിസ് ഹൗസ് സ്റ്റേഷന്‍ ഓഫിസര്‍ പി.എസ് സുരേഷിന്റെ നേതൃത്വത്തിലുള്ള പൊലിസ് സംഘം പിടികൂടിയത്. 2011ല്‍ മോഷണം നടത്തിയ ശേഷം പ്രതി തമിഴ്‌നാട്ടിലെ വിവിധ സ്ഥലങ്ങളില്‍ ഒളിവില്‍ കഴിയുകയായിരുന്നു. പാലക്കാട് തച്ചമ്പാറയില്‍ പ്രതി ഒളിച്ച് താമസിക്കുന്നുണ്ടെന്ന രഹസ്യ വിവരത്തെ തുടര്‍ന്ന് നടത്തിയ അന്വേഷണത്തില്‍ പ്രതിയെ പൊലിസ് പിടികൂടുകയായിരുന്നു.
അന്വേഷണസംഘത്തില്‍ എസ്.ഐ കെ.സി രതീഷ്, എ.എസ്.ഐ ജയകുമാര്‍, സി.പി.ഒമാരായ വിജയന്‍, ജോബിന്‍ ഐസക്, വനിതാ സി.പി.ഒ ജയശ്രീ എന്നിവരാണ് അന്വേഷണ സംഘത്തിലുണ്ടായിരുന്നത്. പ്രതി അഗളി പൊലിസ് സ്റ്റേഷനിലും സമാനമായ കേസ് ഉണ്ട്. ചാവക്കാട് കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.